کۆلانێن تێکهەلبووی
سنور عسمەت ئیبراهیم
ئەرێ ما ژ کەنگی وەرە ئەڤ باژێرە هندە مەزن بوویە و ژ کەنگی وەرە کۆلانێن وێ هندە هاتینە گوهۆڕین کو ئەز ب ڕێکا مالا خوە نە کەڤم، دزانم ڤێ سپێدەهیێ ئەز ل مالەک نێزیک ڤارا دەرکەفتبووم بەلێ ب دورستی ل بیرا من نینە کیژک بوو، یان دبیت د بنەرەت دا من چو جھ نەبن ب ناڤێ مال!
– هێی پیرەمێرۆ(کەسەکێ ب دەنگەکێ بلند گۆت) نیڤا جادەیێ بەردە، ما تو نابینی تڕومبێل یێ دهێن. ئەز ب دروستی د ئاخفتنێن وی یێن دی نەگەهشتم و من باش های ژێ نەبوو کا چ دگۆت، چونکی دەنگێ خوە نزم کر و بەردەوامی دا ڕێکا خوە و د بن لێڤکا ڤە پتپتەک دکر، من دزانی بەحسێ من بوو. من گۆپالێ خوە دا بن ملێ خوە و هەولدا مالا خوە ببینم، ئەو ژی ئەگەر من هەبیت!. ئەز د کۆلانەکا تەنگ و درێژ را بۆریم، من هزر دکر مالا من یا ل وێرێ چونکی من گوھ ل دەنگێ کەنیێ خوە یێ زاروکینییێ دبوو، دگەل وان زارۆکێن نوکە یارییا تەبەلانێ دکەن. بەلێ من سەرێ خوە بلند کر و چاڤێ من ب مالەکا ئاخێ یا کەڤن و دەرگەهێ وێ یێ ژەنگی کەفت، کو دکەفتە د کۆلانا بەرامبەر دا.
من ژنەک دیت یا ل بەر وی دەرگەهی ڕاوستیای و چانتەکێ قوتابخانەیێ یێ د دەستی دا و بەرێ خوە ددەتە من، ئەو یا ل هیڤییا من!. ب هەمی شیانێن خوەڤە من هێز دا وی لەشێ خوە یێ لاواز، یێ ب دروستی شیانێن ڕێڤەچوونێ نەبن و ئەز بەرەڤ وێڤە چووم. ئەز یێ ب کەیفم چونکی من مالا خوە دیت. لێ بەری ئەز بگەهمە وێ، زارۆکەکێ بەری من غاردا و دەیکا من هەمبێز کر، وێ ژی ئەو ماچی کر و چوونە د مالا خوەڤە. وەی ئەز چەند كوڕەكێ خرابم، ئەز چاوا دێمێ دەیکا خوە دگەل یێ دەیکێن خەلکی خەلەت دکەم. بەلێ ناڤەشێرم دێمێ وێ ل بیرا من نینە. ئەز وەستیام و بێ هیڤی بووم، هێدی هێدی ل سەر وێ پیادەیێ ڕەخێ جادەیێ ڕوینشتم و ئەو تشتێن من ژ دکانێ کرین ئینانەدەر. دو سمیت و دو شەربەتێن هنارێ، ئەز نزانم بۆچی هەر تشتەک دونە، بەلێ دزانم گەلەک یێ برسیمە و من سمیتەک خوار. ژبلی ڤان تشتان من دەستکەکێ گولێن بەیبینێ ژی یێن ئیناین کو ژبەر مانا وا یا زێدە د عەلاگەیدا پەرێن وا یێن چرمسین.
ئەز هندەک جاران د خوە نا گەهم، ئەرێ ما من بۆ خوە گول کرینە ؟ بەلێ ئەز حەز ژ گولان ناکەم، یان ژی دبیت حەز ژێ بکەم، بەلێ ل بیرا من نەبیت. ئەز یێ مژویلی خوارنا سمیتێ بووم، دگەل بەرێخوەدانا چوونا هێدی هێدی یا ڕۆژێ بۆ پشت وان ئاڤاهیێن دویر و بلند، دەمێ ل سەر ملێ خوە یێ ڕاستێ زڤریم و من ژنەک دیت هێدی هێدی ژ کۆلانێ دهێتە خوار، وەسا دیارە ئەو ژی وەکی من ژبەر ئێشانا پێیێن خوە نەشێت ب دروستی ب ڕێڤە بچیت. ئەو یا نێزیک دبیت و هەست پێ دکەم یا بەرەڤ من ڤە دهێت. ئەوێ شالەکا کەڤن و شین کو ب گولێن بەیبینێ ل سەر هاتینە نەخشاندن دانابوو ل سەر ملێن خوە، ئەڤە ئەو شالە یا من ل ئێک ژ سالڤەگەرێن شەهیانا مە بۆ وێ کرییە دیاری، وەی خودێ ئەو خانما منە!.
وێ ب تووڕەی ڤە گۆت: دێ بێژی تو گەنجەکێ بیست سالی و چەند تە بڤێت دێ ژدەرڤە بی بێی گوھ بدەیە ساخلەمییا خوە، ژ سپێدێ وەرە ئەز یا ل هیڤییا تە و د خەما تەدا بووم، ما تە ژی پیچەک هزرا من نەدکر و نە دگۆتە خوە کو تە پیرەژنەک ب تنێ یا هێلایە د مال ڤە؟ کا وێ هەمییێ بهێلە، نۆژداری چ گۆتە تە؟
– ژنوی ل بیرا هات، ئەوی گۆت: تو یێ تووشی نەخوەشییەکا ژبیرکرنێ بووی، بەلێ ل بیرا من نینە ناڤێ وێ چ بوو!
