ئەز ژ مالباتا خوە فێری ستران گۆتنێ بوویمە
زاخۆ، دلۆڤان هالۆ:
هونەرمەندا کورد یا باکوورێ کوردستانێ بنەفش جزیری، د دیدارەکێ دا بۆ ڕۆژناما ئەڤرۆ دیارکر کو ئەز ل سالا 1988ێ ژ دایك بوویمە، و ئەز د مالباتەکا هونەر دوست دا مەزن بوویمە، لەورا ل ژیێ 1٤ سالیێ من دەست ب ستران گۆتنێ کریە، و بەرهەمێن من یێن دەستپێکێ دوو ستران بوون ب ناڤێن باز و کەڤۆکێ.
ناڤهاتیێ ئاماژە ب وێ چەندێ ژی کر کو من شیا ب ڤان هەر دوو سترانێن خوە سەرکەفتنەکا باش ب دەستڤە بینم، و پاشان من چەندین ستران ب شێوێ ڤیدیۆ کلیپ بەلاڤکرینە وەکو سترانێن ژانا عەشقێ و هیڤی و هاوارا من و وەرە تە ببینم و ئاخا من، و نووترین بەرهەمێ من ژی بناڤێ ئەڤینا تەمە کو د ئەڤ سالە دا ب شێوێ ڤیدیۆ کلیپ هاتیە بەلاڤکرن.
گۆت ژی:»ستران گۆتن دناڤ مالباتا مەدا ژ کەڤندا هەبوویە و هەتا نوکە ژی بەردەوامە، و ئەز ژ باب و باپیرێن خوە فێری ستران گۆتن و دەنگبێژیێ و سترانێن فۆلکلوری بوویمە، هەموو مالباتا من ژ بۆ کارێن من یێن هونەری لگەل مندا پشتەڤان و هاریکارن ب تایبەت بابێ من گەلەك هاریکارە بۆ ئەنجامدانا کارێن من یێن هونەری».
زێدەتر ژی گۆت:»هندەك ژ هونەرمەندێن کورد یێن وەغەرکری کاریگەریەکا مەزن ل سەر هونەرێ من کریە وەکو هونەرمەندان محەمەد عارفێ جزیری و حەسەن جزیری و محەمەد شێخۆ و عەسعەر جزیری، دەنگ و سترانێن وان ئەز کرمە عاشقێ هونەر و سترانێن کوردی».
