خەنجەرێن بێ دەستیێ
دلدار محەمەد
ئەڤرۆ بۆ تە رۆژەکا نەخۆش بوو، نەخۆش بتنێ بۆ رەوشا دل و دەروونێ تە کێمه، لەوما پەیڤ یێن لسەر رێزکێن بەرپەڕێ تە ب تووڕەیی ڤه خونیشاندانان دژی تە دکەن! دژی قەلەمێ تە !ما نەخۆش بتنێ بۆ مزگینییا مانێ، مزگینبیا ئابرووچوونا سەرشاشەیان چەند!
دەنگەک یێ د تە دا ل تە دکەتە قێری، دبێژیت ته رابە هەرە سەرێ خۆ بشکێنە؛ بەلکی ئەو برینە دەنگە دەنگا کێماتییا تە ژبیرببەت، هەرە سەر بانێ بلندێ خانییێ خۆ، خۆ تێدا بهاڤێ؛ بەلکی دەستێ تە پی یێن تە بشکێن، بەلکی بمری و ئابرووچوونا ته ژبیرا هەمیا بچی. دێ رابە، ما ئەڤە چەند سالە تو دمری، ما تو دشێیی هەمی سالا ل ئەڤرۆکە، هەمی سالان لڤێ مەهێ، بیرا تە ل مرنا تە بهێت، بیرا تە ل بەر بارانا بێ وژدانانە بهێت، بیرا تە ل لەفەیێن کەل و هزارەکا بتنێ و زکێ تە یێ ڤالا بهێت…!
باشبو تە ئاگەهـ ژ خۆ هەبووی بەری ئەو تڕومبێلا ل ترافیکێ دای تە ب جادەیێ ڤه بکەته هژی. دێ رابە دەم یازدەی شەڤێ یه، ئەو دوو کلینسێن تە سپێدێ وەرە فرۆتین، تێرا لەفەیەکا فەلافلا بۆ تە و پەرۆکەکێ پشت ئێشانێ بۆ دەیکا تە دکەن…!
– پا کرێ؟ پا دختۆرێ ددانێن تە یێن ب ئێش؟ پا بهایێ کوستەرا قوتابخانەیا زاڕۆکان؟
تە پویتە ب بابلەکانا نیشانێن پرسیارێن بێ بەرسڤێن د سەرێ خۆ دا نەدا و تو ڕابووی هاتی، چو نینە… تاریاتییا ژۆرێ ڕۆندکێن تە یێن ڕۆتین یێن ڤەشارتین.
