تـرامپی زیانێن مەزن گەهاندینە پێگەهێ ئـەمریکایـێ ل رۆژهەلاتـا نـاڤین
بسپۆرەکێ پەیوەندیێن نێڤدەولەتی دیار دکەت، ترامپی بێی ئاگەهداری و پشتەڤانیا هەڤپەیمانێن ئەمریکا ئێرشی ئیرانێ کر و بێی بەرچاڤ وەرگرتنا بەرژەوەندیێن وان بزاڤا دروستکرنا سیستەمەک نوو دا و ژ بەر ڤێ یەکێ ژی زیانێن مەزن گەهاندە پێگەهێ ئەمریکا.
د. ئیقبال دووڕە بسپۆرێ پەیوەندیێن نێڤدەولەتێ دیار کر، ترامپی بەری کو ئێرشی ئیرانێ بکەت نە ل گەل هەڤپەیمانێن ئەمریکا ل ئۆرۆپا و نە ژی ل گەل وەلاتێن دی یێن دۆستێ ئەمریکا دانوستاندن نەکر و بەرەیەک ل دژی ئیرانێ دروست نەکر، ترامپی ژ بۆ بەرژەوەندیێن جودا ئێرشی ئیرانێ کر و هەروەسا د دەمێ شەڕی دا ژی گەلەک گۆتنێن توند ل دژی هندەک ژ هەڤپەیمانێن ئەمریکا بکارئینان و نەشیا د شەڕێ ل ئیرانێ دا ژی سەرکەڤیت، ئانکۆ ئەوا ئەمریکا دڤیا بدەستڤە نەئینا و گۆت: (دڤێت بێژم کو د شەڕێ نوو دا هەموو تشت بکارئینانا چەکی و کوشتنا هندەک سەرکردەیان نینە، هندەک ئارمانجێن ستراتیژی هەنە کو تو وان بدەستڤە نەئینی ئانکۆ تە شکەست خواریە و یا ترامپی ژی کری وەسایە، چونکی نەشیا رژێما ئیرانێ ژناڤ ببەت و هەروەسا هەتا نها ژی بابەتێ دەرتەنگا هورمز بوویە ئاریشە و وەلاتێن هەڤپەیمانێن ئەمریکا ژی نها ژ ترامپی توورە نە).
ناڤهاتی ئەو یەک ژی دیار کر، ئەمریکا نەشیایە هەتا نها ژی ئیراقێ ل ژێر کاریگەریا ئیرانێ دەرخینیت و هەروەسا نەشیایە مەترسیا گرۆپێن چەکدار ژی کێم بکەت، وەلاتێن عەرەبی و وەلاتێن دی یێن هەڤپەیمانێن ئەمریکا ژی نها گەلەک دلگرانن، چونکی ب جهێ پێگەهێ ئیرانێ لاواز بیت نها بەرۆڤاژی لێ هاتیە و ئیران ئێدی بێی ترس و دو دلی دشێت ئێرشی هەر وەلاتەکێ عەرەبی ل دەڤەرێ بکەت و گۆت: (رەوشا نها نیشا ددەت کو پێگەهێ ئەمریکا ل رۆژهەلاتا ناڤین گەلەک لاواز بوویە، سیاسەتا شاش یا ترامپی و حسابێن جودا یێن وی وەسا کر نها رەوشەکا نوو هاتیە پێش کو ب تەمامی د بەرژەوەندیا ئیرانێ دایە و ئەو یەک بوویە ئەگەر هەڤپەیمانێن ئەمریکا ل دەڤەرێ نها هەست ب مەترسیەکا گەلەک مەزن دکەن).
بسپۆرێ پەیوەندیێن نێڤدەولەتی د دووماهیا ئاخڤتنا خوە دا ئەو یەک ژی نەڤەشارت کو، نها گوهۆڕینێن مەزن ل جیهانێ و رۆژهەلاتا ناڤین دروست بووینە، ئیران نها وەسا دبینیت ئێدی دشێت ببیتە هێزەکا گەلەک مەزن و کاریگەر ل دەڤەرێ و دێ فشارێن خوە ل سەر وەلاتێن عەرەبی یێن هەڤپەیمانێن ئەمریکا ژی زێدەتر لێ کەت و ئێدی ئیران دشێت کارتا دەرتەنگا هورمزێ بۆ بهێزکرنا پێگەهێ خوە بکار بینیت و مخابن ترامپی ب حسابێن خوە یێن شاش وەسا کر نها ئیران هەست دکەت هێزەکا گەلەک مەزنە ل دەڤەرێ و بەرپرسێن ئیرانێ بەرۆڤاژی سالێن بۆری نها چو حسابەکێ بۆ گەفێن ئەمریکا ژی ناکەن.
