ماکـرۆن دێ سـەرەدانا شـامێ کـەت
دەزگەهێن راگەهاندنا فرەنسا دیار دکەن، بریارە د دەمەکێ نێزیک دا ئیمانوێل ماکرۆن سەرۆکێ فرەنسا سەرەدانا شامێ بکەت و ل گەل سەرۆکێ سووریێ ئەحمەد شەرع کۆمبیت و سەرۆکێ فرەنسا دڤێت سەبارەت ب رەوشا ئالۆز یا ل سووریێ و هەروەسا بابەتێ مافێ کوردان ل گەل بەرپرسێن سووریێ دانوستاندنان بکەت و بەری نها ژی فرەنسا هۆشداری دایە سەرۆکێ سووریێ کو نابیت توندوتیژی ل دژی کوردان و نەتەوەیێن دی ل سووریێ بهێتە کرن.
دەزگەهێن راگەهاندنا فرەنسا دیار دکەن، سەرەدانا ماکرۆنی پەیامەکا گەلەک ئاشکرایە کو فرەنسا پشتەڤانیێ ل سووریایەک نوو و دیموکراتی دکەت کو تێدا مافێن هەموو پێکهاتەیان بهێتە پاراستن، ب تایبەتی ژی ئالۆزیێن نها د ناڤبەرا دورزیان ل گەل شامێ دا کو ماکرۆنی بەری نها دیار کربوو دڤێت شام رێزێ ل داخوازیێن وان بگریت.
چاڤدێرێن سیاسی ژی دیار دکەن سەرەدانا سەرۆکێ فرەنسا بۆ سووریێ کو دبیتە ئێکەم سەرەدانا وی پشتی ژناڤچوونا رژێما بەشاری بۆ سووریێ، سەرەدانەکا گەلەک گرنگ و دیرۆکی یە، چونکی نها ئالۆزیێن مەزن ل سووریێ هەنە و هەروەسا ترامپی ژی دڤێت شامێ ل دژی حزبوللا لوبنانێ بکار بینیت و ئەو یەک ژی ب دلێ فرەنسا نینە، چونکی بەری نها سەرۆکێ فرەنسا دیار کریە وان دڤێت سووریا نوو پەیوەندیێن باش ل گەل هەموو وەلاتێن جیرانێن خوە دروست بکەت و نەبیتە مەترسی بۆ چو وەلاتەکێ، ژ بەر ڤێ یەکێ ژی دبیت سەرەدانا سەرۆکێ فرەنسا ببیتە پشتەڤانیەکا باش بۆ ئەحمەد شەرعی کو وی نەڤێت سووریێ تووشی شەڕەکێ نوو بکەت.
ل گۆر باوەریا چاڤدێرێن سیاسی فرەنسا دڤێت کاریگەریا وێ یا ب سالان ل سەر سووریێ بەردەوام بیت، چونکی فرەنسا رازی نینە ئەمریکا بریارێن چارەنڤیسساز ل دۆر پاشەرۆژا سووریێ بدەت و سەرەدانا ماکرۆنی ژی پەیامەکا گرنگە بۆ هەموو وەلاتان کو ئەو ب چو رەنگەکێ دەست ژ سووریێ بەرنادەن.
