ئەڤ سالە روودانێن خەندقینێ زێدەبووینە
هەولێر، قائید میرۆ:
پەیڤدارێ بەرگریا شارستانی هۆشداریێ ل دۆر حالەتێن خەندقینێ ددەت و دبێژیت: ئەڤ سالە روودانێن خەندقینێ زێدەبووینە و پێدڤیە وەلاتی دهشیاربن، چونكی ئەڤ سالە ئاستێ ئاڤێ بلندبوویە و مەلەڤانی ب مەترسینە.
سەركەوت كاڕەش، پەیڤدارا بەگریا شارستانیا هەرێما كوردستانێ بۆ رۆژناما ئەڤرۆ دیاركر، ئەڤ سالە خەندقینا وەلاتیان بەریی هاتنا وەرزێ گەرمێ دەستپێكریە و ل مەها نیسانێ وەرە روودانێن خەندقینا وەلاتیان دهێنە تۆماركرن و گۆت: «هەتا نوكە 36 وەلاتی خەندقینە، ئەڤە ژی ئامارەكا مەترسیدارە، چونكی هێشتا ئەم یێ ل دەستپێكا وەرزێ گەرمێ و روودانێن خەندقینێ ژ نوكە پێڤە دێ دەستپێكەن، ئەگەر رەوش یا هۆسابیت، هەتا دوماهیا ئەڤ سالە دێ رێژەیا خەندقینێ گەلەك زێدەبیت، ئەم پێشبینی دكەین ژ سالا بۆری زێدەتر بیت».
گۆت ژی: «دەمێ وەلاتی سەرەدانا جهێن گەشتیاری دكەن و دچنە سەر ئاڤ و رووباران د هشیاربن، چونكی ئەڤ سالە ئاستێ ئاڤێ گەلەك زێدەبوویە و وەلاتێن جیران ژی بەردانا ئاڤێ ل بەنداڤان زێدەكریە، سالێن بۆری ئەو كەس د خەندقین یێن مەلەڤان نەبوون، لێ ئەڤ سالە هندەك ژ وان كەسێن خەندقی مەلەڤان بووینە و ژبەر بلندبوونا ئاڤێ خەندقینە، هندەك وەلاتی ل جهێن قەدەغەكری مەلەڤانیان دكەن و پێگیریێ ب رێنمایێن بەرگریا شارستانی ناكەن».
