ب بڕیارا سەرۆكێ حوكمەتێ كارئاسانی بۆ پڕۆژەیێن وەبەرهێنانێ ل ئاكرێ دهێنە كرن
رەمەزان زەكریا:
دكتۆر هەڤال سەدیق ئاكرەیی، ڕێڤەبەرێ گشتی یێ وەبەرهێنانێ ل پارێزگەها دهۆكێ دیار كر، د كابینەیا نەهێ دا ب سەرۆكاتیا مەسرور بارزانی دوپاتی ل سەر هندێ دهێتە كرن، كو پڕۆژەیێن وەبەرهێنانێ بگەهنە دەڤەرێن كێم گەشەكری، ب تایبەتی ژی دەڤەرداریا ئاكرێ و دبێژیت: د ڤان سالێن بۆری دا، مە بەرێ چەندین پڕۆژەیێن وەبەرهێنانێ دایە ئاكرێ و گەلەك ژ وان كەفتینە د بیاڤێ بجهئینانێ دا.
ناڤبری گۆت: «ب بڕیارا مەسرور بارزانی، سەرۆكێ حكومەتا هەرێما كوردستانێ هەر پڕۆژەیەك ل دەڤەرێن كێم گەشەكری، وەكو ئاكرێ بهێتە دروستكرن، مەزنترین كارئاسانی بۆ دهێنە كرن، ژ وان ژی: لێخۆشبوون ژ كرێیێن خزمەتگوزاری و كرێیێن سالانە و بۆ دەمەكێ درێژ ژ باج و بابەتێن خۆیەتیێ، ل سەر دەمێ كابینەیا نەهێ 19 پڕۆژەیان ل ئاكرێ مۆلەت وەرگرتیە، كو هندەك ژ وان گەلەك ستراتیژینە».
گۆت ژی: «ژ وان پڕۆژەیان، پڕۆژەیێ عەلەوا ئاكرێ، كو پڕۆژەیەكێ ستراتیژییە ل سەر ئاستێ هەموو ئیراقێ و دێ بیتە ئەگەرێ پەیداكرنا چەندین دەلیڤەیێن كاری، پڕۆژەكێ مەزن یێ گەشتیاری پتر ژ سالەكێیە كەفتییە د بیاڤێ بجهئینانێ دا، كو ل سەر ڕووبەرێ 485 دۆنەمێن ئەردی دهێتە دروستكرن و 300 هەتا 400 دەلیڤەیێن كاری ب شێوەیەكێ ڕاستەوخۆ دێ پەیدا كەت، هەروەسا پڕۆژەیێ پیشەسازیا ئاكرێ مۆلەت پێ هاتییە دان، بەلێ ژبەر ئاڕێشەیێن ئەردی راوەستایە».
د. هەڤال ئاشكرا ژی كر، نێزیكی 10 پڕۆژەیێن دی هەنە و ل ڤان نێزیكان دێ كەڤنە د بیاڤێ بجهئینانێ دا و ئەڤە هەموو دێ بنە ئەگەرێ گەشەكرنا ئابووری و پەیداكرنا دەلیڤەیێن كاری.
