ل سنۆرێ دەڤەرداریێن ئاكرێ و بەردەڕەشێ رێكێن پڕانیا گوندان دهێنە سەخبێركرن
رەمەزان زەكەریا:
د چارچۆڤێ پڕۆژەیێن بەردەوام یێن حكومەتا هەرێما كوردستانێ دا، ڕێڤەبەریا سەخبێركرنا ڕێك و پران ل ئاكرێ هەوەكا ستراتیژی و بەرفرەهـ بۆ نووژەنكرن و قێركرنا ڕێكێن سەرەكی و ناڤخۆیی دەستپێكریە.
ئەندازیار محسن میرانی، رێڤەبەرێ سەخبێركرنا رێك و پران ل ئاكرێ بۆ ئەڤرۆ گۆت: «تیمێن ڕێڤەبەریێ ب شەڤ و ڕۆژ د كاری دانە بۆ سەخبێركرنا ڕێكان ب مەرەما ئاسانكاریان بۆ هاتنوچوونا وەلاتیان».
ناڤبری گۆت ژی: «ل سەنتەرێ ئاكرێ و ناوچەداریا گردەسێن كارێن مەزن هاتینە ئەنجامدان ژ وان ژی: نووژەنكرنا جۆتسایدێ ڕۆڤیا بۆ ئاكرێ، ڕێكا شێخانۆك و دەوربەران ب درێژاهیا 13 كیلۆمەتران و 500 مەتران، ڕێكا سێلان ب درێژاهیا حەفت كیلۆمەتران و ڕێكا لەكان بۆ ئیسماوا ب درێژاهیا 10 كیلۆمەتران، زێدەباری بەردەوامیا كار و خۆشكرنا ڕێكێن چەندین گوندێن دی یێن دەڤەرێ».
ئەندازیار محسن زێدەتر گۆت: «ل ناوچەداریا بجیلێ و دینارتە ژی گرنگیەكا مەزن ب ڕێكێن سەربازی یێن پێشمەرگەی ل دەڤەرا نەهلێ و بەنداڤا بێخمە هاتیەدان و ڕێكێن گوندێن دەڤەرێ ب تەمامی كەفتینە د خزمەتێ دا، هەروەسا پڕۆژەیەكێ ستراتیژی یێ قێركرنێ ب درێژاهیا 17 كیلۆمەتران ژ دینارتە بۆ گوندێ بامشمشێ گەهشتیە قووناغێن دووماهیێ و 90% تەمامبوویە، ل گەل نووژەنكرنا 10 كیلۆمەتران ژ ڕێكا بەهراوان و دارەتوو، قێركرنا ڕێكا دۆڕیانا ئامیانێ بۆ پرا مەندان، كو ب تەمامی كەفتینە د خزمەتا گشتی دا».
