بهایێ پانزینێ دێ ئەرزان بیت
دهۆك، دلۆڤان ئاكرەیی:
وەزیرێ سامانێن سروشتی ب وەكالەت ل هەرێما كوردستانێ دیاركر، هەرێما كوردستانێ ڕۆژانە پێدڤی ب پێنج ملیۆن لیترێن پانزینێ هەیە و دبێژیت: ل رۆژێن بهێن دێ بهایێ پانزینێ زێدەتر ئەرزان بیت.
كەمال مەحەمەد، وەزیرێ سامانێن سروشتی ب وەكالەت ل هەرێما كوردستانێ بۆ رۆژنامەیا ئەڤرۆ گۆت: «پشتی ڤەكرنا دەرگەهێن سنۆری و زێدەبوونا ئینانا پانزینا بازرگانی، بهایێ پانزینێ ئەرزانبوویە و گۆت: «دهێتە پێشبینیكرن د دو حەفتیێن بهێن دا بهایێ ئێك لیترا پانزینا نۆرمال بگەهیتە 850 دیناران، دیسا بەلاڤكرنا پانزینا 750 دیناری ژی دێ بەردەوام بیت و ئەڤ چەندە دێ كارتێكرنەكا زێدەتر ل سەر بهایێ وێ كەت د دەمەكێ كێم دا».
