ڤەشارتنا مریان ل شاخكێ ب رێیا واستەكاریێ دوورە ژ ڕاستیێ
بێوار حەمدی
ڤەشارتنا مریان ل شاخكێ بێی حەفارە هەبیت، هەر كەس دشێت مریێن خوە ڤەشێریت و بابەتێ ڤەشارتنا مریان ل شاخكێ ب رێیا واستەكاریێ دوورە ژ ڕاستیێ.
شێروان حەسەن پەیڤدارێ سەروكاتیا باژێرڤانیا دهوكێ د دیدارەكێ دا بۆڕۆژناما ئەڤرۆ دیار كر، هەروەكی دیاركو بوو دەمەكێ درێژە گوڕستانا مریان ل شاخكێ هاتیە ڤەگۆهاستن ژبەركو جه نەمایە یان دشێین بێژین گەلەك كێم بویە و گۆت: (د نوكەدا ل هندەك جهان وەسا بەڵاڤبویە كو جهێن vip ژبۆ مریان هەنە یان مری ب رێیا واستەكاریێ دهێنە ڤەشارتن ل گوڕستانا شاخكێ، لێ ئەڤ بابەتە دوورە ژ ڕاستیی، ب تنێ ڤەشارتنا مریان ل شاخكێ بێی كو حەفارێ بكاربینن هەر كەس دشێت مریێن خوە ل وێرێ ڤەشێریت و چوو واستەكاری نینە).
ناڤهاتی د بەردەوامیا ئاخفتنا خودا گۆت: ل گوڕستانا شاخكێ و گوڕستانا نوی ژی چ جهێن vip و واستەكاری نینن، بەلكو ڤەشارتنا وان هەموویان وەكو ئێكە و چوو جیاوازی ناهێنە كرن و مە دووڤچوونەكا باش ژ بوو هەبوویە، لێ د نوكە دا ل سەرتەنگێ یە و نە دسنورێن سەروكاتیا باژێرڤانیێ دایە و گۆت: (ژ بۆ گوڕستانا شاخكێ مە پلان هەنە ئەم پتر دووڤچونێ بۆ بكەین، لێ یا سەرتەنگی دكەڤیتە سنورێن رێڤەبەریا گشتی یا باژێرڤانیان).
