ل بارەگایێ فرقا زاخۆ یا لەشكرێ ئیراقێ سێ هەیڤان ئەز دئەشكەنجە و قوتانـێ دا بووم
هەڤدیتن: رەمەزان دەشتمری/ زاخۆ
3-6
ل دەمەكێ مەفرەزەیەكا دیتر هەر یا پێشمەرگەیی ژ گوندێ ئاڤهێ بۆ گوندێ بارهوكێ دهاتن و هەر دیسان ئەڤ پێشمەرگە لێك بین و ڕەش و ل بەرئێك و دوو ڕاوەستان و گازی ئێك كرن و گوتن:ڕاوەستن و نەلڤن، بەلێ ئەڤێ جارێ ژی باشی ب خێرا گوتنا ئینانا ناڤێ شەڤێ ئێك و دوو ناسكرن و چ تەقە دناڤبەرا ئەوان دا نەهاتكرن. ل ئەوی دەمی پەیوەندیێن مەفرەزەیێن پێشمەرگەیی ل دەڤەرێ ب ڕێكا هێلێن ڕیكخستنێ و ناڤێ شەڤێ بۆ ئێك و دوو دگەهاندن و ناڤێ شەڤێ ڕێخوشكەر بو دنافبەرا پێشمەرگەیی و هاتن و چوونا خوە ل دەڤەرێ ب ئێمناهی و ئارامی كار و ئەركێ خۆە بجهدئینان. هەر وەسا پێشمەرگەیێ شۆڕشا 26ی گولانێ تاهر بارهۆلی بەردەوامی دا ئاخفتنا خوە دا و دبێژت: ل سالا 1978ی پێشمەرگەیەك هات خوە ڕادەستی حكومەتا ئیراقێ كر و ناڤێ دا دایرا ئەمنا ناحیا باتیفا و ئەز ئاشكرا بووم و ئەز نەچاربووم من خۆە ژ ناڤ حكومەتێ ڤاڕێكر و ئەز وەك تومەتبار ل گوندێ بارهولێ مام و گەلەك جاران مەفرەزیێن ئەمنا حكومەتا ئیراقێ پێكولكرن كو من دەستەسەر بكەن بەلێ نەشیان من بگرن. بیرهاتنەكا دیتر یا گەلەك نەخوەش ئەوبوو ل سالا 1979ی مە بوخوە بیستانێن باجانێن سور ل چەمێ گوندێ گوفكێ كربون. ڕۆژەكێ ئەز و دگەل هەردوو هەڤالێن خۆە عەزەدین سەعید و سەمەد حەسەن عەلی ژ گوندێ بارهۆلێ بۆ ناڤ بیستانی ل چەمێ گوفكێ چوین و ل ئەوی دەمی هێرشا لەشكرێ حكومەتا ئیراقێ بۆ سەردەڤەرێ هاتبو و ل ناڤبەرا گوندێ مێسكێ و گوندێ گوفكێ دا دەستەركرین و دەمێ داخوازا ناسناما ژمە كرن، دەمێ ئەوی ئەفسەرێ ئیستخباراتا لەشكری بەرێ خۆە دایە ناسناما من و كو ناڤێ من تاهر دیت و هەر ئێكسەر ئەم هەرسێ گرتن، و دەستێن مە ژپشتڤە گرێدان و ل ترومبێلەكا لەشكری سیاركرن، و هەر ئێكسەر بۆ بارەگایێ لیوا باتیفا ڤەگوهاستین. دەمێ ئەم بۆ بارەگایێ لیوایێ گەهاندین و هەر ئێكسەر پرسیارا ناڤێ من كرن، و گوتن ئەڤە ماوێ چەندێ یە ئەم یێ ل تە دگەڕین؟ وی ئەفسەرێ ئێسخباراتێ گوتە من: تو تاهر عەبدوللایی. من گوتێ نەخێر: ناڤێ من تاهر سەعدوللا یە. هەر ئەو پێشمەرگەیی خوە ڕادەستی حكومەتا ئیراقێ كری، وی ناڤێ بابێ من ل جهێ سەعدوللا ئەوی عەبدوللا دابوو ئەوان. ئەوبوو ئەم ژ بارەگایێ لیوا باتیفا بۆ بارەگایێ فرقا لەشكری یا زاخۆ ڤەگوهاستین. ڕۆژانە ڤەكولین دگەل مە دهاتكرن و گەلەك جورێن ئەشكەنجێ ئەم قوتایین. پشتی بورینا سێ هەیڤان دبن ئەشكەنجێ و نەخوشیێ دا ل بارەگایێ فرقا زاخۆ دا مە بوراندین، پشتی بورینا بیست و هەشت ڕۆژان ئەم ئازادكرین، و ئەز بۆ مال ل گوندێ بارهۆلێ هاتم.
هەر وەسا ڕویدانەكا دیتر یا گەلەك سەیر ل گوندێ بارهۆلێ پەیدابوویی، ئەو ژی هەر ل سالا 1979ی هێزەكا مەزن یا لەشكرێ حكومەتا ئیراقێ ژ بارەگایێ لیوا باتیفا بۆ سەر دەڤەرێ ڤە هات، و هەر ژ گوندێ مێسكێ و گوندێ غولدیا و بۆ گوندێ بارهۆلێ و گوندێ بلێجانی و بەر خابیر و خابیر هاتن و هەتا بۆ لیوا بێگوڤا چوین و ئەڤێ دەڤەرێ لێ گەڕیان بۆ كرین. ئەوبوو ل بنێ گوندێ بارهۆلێ لەشكرەكی حكومەتا ئیراقێ ب ناڤێ عیسا كو خەلكێ باژێڕێ بەسرا بوو و ژ هەڤالێن خوە ڤەقەتیا و بتنێ مابوو ب ڕێكێ ڤە و ئەڤ كەسێ لەشكر تڤەنگەكا ژ جورێ كلاشینكوف چل خوەر دگەل دابوو. دەمی ئەڤی لەشكری قەستا ناڤ گوندی كری، ل ئەوی دەمی برایێ من شەوكەت و دگەل هەردوو پێسمامێن من بەهجەت نایف و رەمەزان ئاڤەدەل كو ل ئەوی دەمی قوتابی بوون ڕابین ئەو لەشكر بۆ ناڤ مەفرەزا پێشمەرگەیی برن و ڕادەستی ئەوان كرن. بەلێ ئەو لەشكر دگەل وان نەچوو و هات دا قەستا ناڤ گوندێ بارهۆلێ كەتەڤە. دەمێ خەلكێ گوندی ئەو لەشكر دیتین و خەلكێ گوندی ب زەلام و ژن و زارۆك ل دور خرڤەبین و مە تەماشەیی ئەوی لەشكری كر. ئەڤی لەشكر ژی ژ ترسێن خوەدا چەكا وی ما ددەستان دا و نەهێلا كەسەك خۆە نێزیكی ئەوی بكەت. خەلكێ گوندی یێ ل نیڤا گوندێ خرڤەبوین و مە بەرێ خوە دایێ چوار پێشمەرگە بۆ ناڤ گوندێ بارهۆلێ ڤە هاتن و پێشمەرگەیەك ژ ئەوان كارێ خۆە كر دا تەقێ ل ئەوی لەشكر بكەت. ل ڤێرێ مامێ من تەتەر ب دەنگەكێ بلند گازی ئەوی پێشمەرگەیی كر و گوتێ سەرحوچێ من: هەمی لەشكر د بەر هەوە دابورین هەوە شەر نەكر و ئەڤ لەشكرە نوكە دیلێ گوندییە وهوین دێ ژنویكا هێرش كەنێ و كوژن. ئەوبوو گوندییا نەهێلا پێشمەرگە تەقێ ل ئەوی لەشكری بكەت. پاشی خودێ ژێ ڕازی مامێ من تەتەر و دگەل ئەیوب حەمدی دگەل ئەوێ لەشكرهاتن و ئینان و ڕادەستێ بارەگایێ لیوا باتیفا كر. ڤێجا دەمێ ئەوێ لەشكر ژ هەڤالێن خۆە ڤەقەتیایی ئەو لەشكر بۆ لێگەڕیانی هاتین جارەكادیتر ژ گوندێ ئاڤهێ پاشدا زڤڕین و پرسیار هەڤالێ خۆە ئەوێ ڤەمایی بكەن. پشتی پەیوەندی ل بارەگایێ لیوا باتیفا كرین و گوتین دێ پاشدا زڤڕین كو هەڤالەكی ئەوان یێ بەروەبوویە. ل ئەوی دەمێ بارەگایێ لیوا باتیفا گوتە ئەوان پاشدا ب زڤڕن و ئەڤە ئەو لەشكرێ بەرزەبویێ یێ بۆ بارەگایێ لیوایێ هاتی و دێ ل ڤێرێ ئەوی سزادەین. پاشی مە بڕیاردا ئەم قەستا ناڤ ڕێزێن شۆڕشا 26ی گولانێ بكین.
ل ڕۆژا 15/3/1981ی ئەم هەژمارا نەه كەس ژ خەلكێ گوندێ بارهۆلێ كو پێكاتبین هەر ئێك ژ ئەز تاهر سەعدوللا، نایف مەعروف، ئەیوب حەمدی، عەمەر یوسف، ماهر سەعدوللا، جەهوەر عەبدال، حەسەن یوسف، سدقی تاهر. ب چەكێن خوەڤە ئەم دگەل خودێ ژێ ڕازی سەعدو كوڕكی و ئوسمان قاسم ل دانێ ئێڤاری ژ گوندێ بارهۆلێ بۆ گوندێ گرێ بیێ هاتین و ب شەڤێ ل جادا گشتی دەربازبین و بۆ گوندێ بەرانشێ و گوندێ ڕویسێ چوین و ل دەمژمێر سیێ ئێڤاری بۆ بارەگایێ لقێ ئێك گەهشتین. ل ئەوی دەمی دكتور جەرجیس بەرپرسێ لقێ ئێك بو و پێشەوازیەكا گەرم ل مە هاتكرن، و هەر ئێكسەر ئەم وەك پێشمەرگە ل بارەگایێ لقێ هاتن وەرگرتن. ئەو بوو وەك مەفرەزە ئەركێ مە ل بەر خالا زیندانێ و خالا نوبەداریێ ل ملا داركا مەلایێ بوو.
