ب رێكا ئەپلیكەیشنەكی شۆفێر دێ پانزینێ وەرگرن
بەرپرسەكێ پشكا پشكنین و دووڤچوونێ ل نەفت و كانزایان ل حوكمەتا هەرێما كوردستانێ دیاركر، د نوكە دا كار ل سەر ئەپلیكەیشنەكی بۆ شۆفێران دهێتە كرن و دبێژیت: چو شۆفێر نەشێن د ڕۆژەكێ دا دو جاران پانزینێ وەربگرین.
سالار مەحەمەد، بەرپرس ل پشكا پشكنین و دووڤچوونێ ل نەفت و كانزایان ل حوكمەتا هەرێما كوردستانێ بۆ رۆژنامەیا ئەڤرۆ گۆت: «ئەو پانزینا حكومی یا ل بەردەست هەی ئێك ملیۆن و 700 هەزار لێترە بۆ هەر ڕۆژەكێ و ب بهایێ 750 دیناران بۆ هەر لێترەكێ دهێتە بەلاڤكرن، ئەم چاڤدێریا پانزینخانەیان ب توندی دكەین».
گۆت ژی: «ل دووڤ زانیاریێن مە، وەزارەتا پەیوەندیدار موژیلی وێ چەندێ یە، كو د دەمەكێ نێزیك دا ئەپلیكەیشنەكی بۆ بەلاڤكرنا پانزینێ كارا بكەت، دا كو چو شۆفێر ڕۆژانە ژ ئێك جار زێدەتر پانزینا حكومی وەەرنەگریت، شۆفێر ناڤێ خۆ و هەژمارەیا سالانەیا ترۆمبێلا خۆ دێ تومار كەتن هەر دەمەكێ چوو پانزینخانەیێ و پانزینا 750 دیناری داگرت، هەتا سێ ڕۆژان ئەپلیكەیشن كارا نابیتەڤە و نەشێت بكار بینیت و جارەكا دی پانزینێ وەربگریت».
