تەرمێ ئەو گەنجێ بـەری شەش رۆژان ل شێلادزێ خەندقی هاتە دیتن
ئامێدیێ، مەحمود نهێلی:
پشتی شەش رۆژان ژ لێگەڕیانێ ل تەرمێ وی گەنجێ ل شێلادزێ كەفتیە د ئاڤێ دا و خەندقی، دوهی 29/7/2026 تەرمێ وی ب دووراتیا زێدەتر ژ 40 كیلۆمەتران ل گوندێ بلێسە ل نێزیك بلێ هاتە دیتن.
رۆژهات رێكانی، بەرپرسێ تیما نقوومڤانان یا سەر ب بەرگرییا شارستانی یا ناوچەدارییا شێلادزێ ڤە بۆ رۆژناما ئەڤرۆ دیار كر، ئەڤە شەش رۆژ بوون چەندین تیمێن نقوومڤانان و خەلكێ دەڤەرێ ل سەر رێگەڕیانێ ل تەرمێ محەمەدی، ئەو گەنجێ ل رۆژا ئەینییا بۆری ل سەر رووبارێ شین د بەرئاڤێ دا چوویی بەردەوامبوون و گۆت: «سوپاس بۆ خودێ، تەرمێ وی ل گوندێ بلێسە ل نێزیك بلێ ل دەڤەرا بارزان هاتە دیتن».
گۆت ژی: «ئەم بەردەوام دێ د كاری دا بین ژ بۆ كۆترۆلكرن و قۆرتالكرنا وان كەسان یێن ب مەرەما گەشتوگوزارێ قەستا دەڤەرێ دكەن، لێ هیڤی دكەین ئەو جهێن قەدغە خوە ژێ دوور بكەن و مەلەڤانیا تێدا نەكەن، دا كو ژیانا وان یا پاراستی بیت و چو كارەساتێن دی یێن ب ڤی رەنگی ل دەڤەرێ دروست نەبن».
محەمەد سەفەر یێ تەمەن 25 سالی، گەنجەكێ سەنتەرێ پارێزگەها دهۆكێ بوو، كو ب مەرەمە سەیرانێ ل رۆژا ئەینی رێكەفتی 24/7/2026 ب مەرەما گەشت و سەیرانێ ل گەل سێ هەڤالێن خوە قەستا رووبارێ شین كربوو، ل دەمێ مەلەڤانیكرنێ بەرئاڤ دبیت و بێ سەروشوین دبیت، پشتی شەش رۆژان، تەرمێ وی هاتە دیتن.
