پەڕلەمانتارەك: مە داخوازكریە مافێن پێشمەرگەی د ناڤ پڕۆژەقانوونا بودجەی دا بهێنە مسۆگەركـرن
هەولێر، قائید میرۆ:
ئەندامەكا لیژنا ئاسایش و بەڕەڤانیێ ل پەرلەمانێ ئیراقێ ئاشكراكر، ڤێ حەفتیێ نڤیسار بۆ گەرەنتیكرنا مافێن خانەنشینێن هێزێن پێشمەرگەی و ئاسایش و پۆلیسان بۆ سەرۆكێ لیژنێ هاتیە بلندكرن و دبێژیت: مە داخوازكریە مافێن پێشمەرگەی د ناڤا پڕۆژەقانوونا بودجەی دا بهێنە مسۆگەركرن.
دكتۆرە چیمەن بابەكر، ئەنداما لیژنا ئاسایش و بەڕەڤانیێ ل پەرلەمانێ ئیراقێ بۆ رۆژناما ئەڤرۆ دیاركر، ئەو د بەردەوامن بۆ گەرەنتیكرنا ماف و شایستەیێن هێزێن پێشمەرگەی و خانەنشین و هێزێن ناڤخۆ، ب تایبەتی مافێن وان د ناڤا پڕۆژەقانوونا بودجەیا ئیراقێ دا بهێنە مسۆگەركرن، هەر ژ دابینكرنا مووچە و شایستەیێن دارایی هەتا هنارتنا چەكی بۆ هێزێن پێشمەرگەی و پێشكێشكرنا هاریكاریێن لۆجستی، چونكی پێشمەرگە و ئاسایش پشكەكن ژ سیستەمێ بەڕەڤانیا ئیراقێ و مافێ وانایە ژ شایستەیین دستووری مفاداربن.
دكتۆرە چیمەن بابەكر گۆت: «ڤێ حەفیێ مە نڤیسارەك ئاراستەی سەرۆكێ لیژنا ئاسایش و بەرەڤانیێ كریە و تێدا چەندین داخوازیێن ئەندامێن خانەنشین یێن هێزێن پێشمەرگەی و پۆلیس و ئاسایشێ تێدانە، ئەڤە ژی ژبۆی دابینكرنا مافێن وان و ئێكسانكرنا مافێن وان ل گەل خانەنشینیا سەر ب هێزێن ئەمنی و سەربازیێن حوكمەتا ئیراقێ ڤە، داكو جوداهی د ناڤبەرا مافێن وان دا ل هەرێم و بەغدایێ نەمینیت».
