دەڤەردارێ شنگالێ: پێدڤیە حوكمەتا ئیراقێ هاریكاریا خەلكێ شنگالێ بكەت
دلڤین رەشید:
نایف سەیدۆ، دەڤەردارێ شنگالێ بۆ رۆژناما ئەڤرۆ دیاركر، ئەو یێ نێزیكی سالیادا جینۆسایدا شنگالێ دبن و دبێژیت: پێدڤیە حكومەتا ئیراقێ هاریكاریەكا تایبەت بۆ خەلكێ شنگالێ هەبیت، ژ بەر ڤێ كارەساتا مەزن یا ب سەرێ خەلكێ بێ گونەه یێ شنگالێ هاتی.
ناڤهاتی گۆت: «ئەم داخوازێ ژ حكومەتا ئیراقێ دكەین، پێنگاڤێن رژد ب هاڤێژیت ژبۆ رزگاركرنا رەڤاندیێن ئێزدی، ئەوێن هەتا نها د بێ سەروشوون، هەروەسا ئەو گۆڕێن ب كۆم یێن ماین هەموو بهێنە ڤەكرن و خەلكێ شنگالێ بهێتە قەرەبووكرن و دەست ب پڕۆژەیێن ئاڤەدانیێ بهێتە كرن، دا كو خەلكێ مە ژی ژ ژیانا ئاوەربوونێ رزگار ببن و ب سەرفەرازی ڤەگەڕنە سەر جه و وارێن خۆ».
گۆت ژی: «ل رۆژا 3/8/2014 چەكدارێن داعشێ هێرش كرە سەر شنگالێ و جینۆسایدەكا مەزن ل دەڤەرێ پەیدا بوو، كو تێدا ب هەزاران كەسێن ئیزدی هاتنە كوشتن و شەش هزار و 417 كەس ژی هاتنە رەڤاندن».
