ب ڕێژەیا 96%ێ ئاڕێشەیا كێمبوونا ئاڤێ ل زاخۆ هاتیە چارەسەركرن
زاخۆ، دلۆڤان هالۆ:
ڕێڤەبەرێ ئاڤا زاخۆ دیاركر كو ب گوژمێ پتر ژ 20 ملیار دیناران و ب ڕێژەیا 96%ێ ئاڕێشەیا كێمبوونا ئاڤێ ل سەنتەرێ باژێڕی ل ئیدارەیا سەربخوە یا زاخۆ هاتیە چارەسەركرن.
ئەندازیار سالح حەسەن، ڕێڤەبەرێ ئاڤا زاخۆ بۆ ڕۆژناما ئەڤرۆ دیاركر كو ل سەر ئاستێ ئیدارەیا سەربخوە یا زاخۆ، حوكمەتا هەرێما كوردستانێ د پێنج سالێن بۆری دا پتر ژ 20 ملیار دیناران بۆ پێشڤەبرنا كەرتێ ئاڤێ و كۆلانا بیران بۆ زاخۆ تەرخانكرینە، ب ڤێ چەندێ ب ڕێژەیا 96%ێ ئاڕێشەیا كێمبوونا ئاڤێ ل سەنتەرێ باژێڕێ زاخۆ هاتیە چارەسەركرن.
ناڤهاتی گۆت: «پڕۆژەیێ ئاڤا پێشابیرێ ل سنۆرێ ناحیا ڕزگاری ب گوژمێ ملیارەك و 200 ملیۆن دیناران هاتیە بجهئینان، ئەڤ پڕۆژە ئاڤا ڤەخوارنێ بۆ سێ كۆمەلگەهێن سەر ب ناحیا ڕزگاری ڤە دابین دكەت».
گۆت ژی: «پاراستنا ئاسایشا ئاڤێ و دابینكرنا ژیانەكا ژ هەژی بۆ وەلاتیان، ژ كارێن سەرەكی و گرنگ یێن كابینەیا نەهێ یا حكومەتا هەرێما كوردستانێ نە».
