دەزگەهـێ خێرخوازی یـێ بارزانی قوتابخانەیێن دەڤەرا ئامێدیێ نووژەن دكەت
ئامێدیێ، مەحمود نهێلی:
وەكو پشتەڤانیەك بۆ پرۆسێسا خواندنێ ل دەڤەرێ، دەزگەهێ خێرخوازی یێ بارزانی دەست ب نووژەنكرنا قوتابخانەیا بیرا رۆژئاڤا ل سنۆرێ ناوچەدارییا شێلادزێ كر و بڕیارە د دەمێ ڤەبوونا دەواما قوتابخانەیان دا بكەڤیتە د خزمەتا قوتابیان دا.
شەڤگەر رەمەزان، نوونەرێ دەزگەهێ خێرخوازی یێ بارزانی ل دەڤەرا ئامێدیێ بۆ رۆژناما ئەڤرۆ دیار كر، وەكو ئەركەكێ خێرخوازی و بەردەوامیدان ب كارێن خێرێ ل دەڤەرێ، دەزگەهێ خێرخوازی یێ بارزانی سالانە هەژمارەكا قوتابخانەیان ل سنۆرێ پەروەردەیا دەڤەردارییا ئامێدیێ نووژەن دكەت و گۆت: «بۆ ئەڤ سالە ژی مە دەست ب نووژەنكرنا قوتابخانەیا بیرا رۆژئاڤا ل سنۆرێ ناوچەدارییا شێلادزێ كریە و ب رەنگەكێ باش و سەردەمیانە دێ هێتە نووژەنكرن».
ناڤهاتی ئاشكرا ژی كر، نووژەنكرنا ڤێ قوتابخانەیێ بەری دەست ب دەواما قوتابخانەیان بهێتە كرن، ئەڤ قوتابخانەیە دێ هێتە نووژەنكرن و تمام بیت و كەڤیتە د خزمەتا قوتابیان دا و گۆت: «وەكو پشتەڤانیەك ژبۆ پرۆسێسا خواندنێ و پێشڤەبرنا ئاستێ پەروەردەیێ ل ڤێ دەڤەرێ، د بەرنامێ مە دایە، ئەو قوتابخانەیێن پێدڤی ب نووژەنكرنێ بن ژ لایێ دەزگەهێ خێرخوازی یێ بارزانی ڤە بهێنە نووژەنكرن».
