بابێ شێخ: ئەم داخوازا دروستكرنا سەنتەرەكێ نیشتمانی یان نێڤدەولەتی بۆ تۆماركرنا تاوانێن جینۆسایدا دژی ئێزدیان دكەین
دهۆك، لەزگین جۆقی:
بابێ شێخ؛ شێخ عەلی شێخ ئەلیاس، لێڤەگەڕێ ڕۆحی یێ ئۆلا ئێزدییان، بەیاننامەیەك بەلاڤكر و تێدا هاتیە: ب هەلكەفتا هاتنا دوازدەمین سالڤەگەڕا جێنۆسایدا كوردێن ئێزدی، ئەم داخوازێ ژ حكومەتا ئیراقێ، حكومەتا هەرێما كوردستانێ و جڤاكێ نێڤدەولەتی دكەین، كو بزاڤێن خۆ چڕتر بكەن بۆ ب دەستڤەئینانا دادپەروەریێ، لێگەڕیانێ ل ئاشكراكرنا چارەنڤیسێ رەڤاندییان، كو هەتا نها مالباتێن وان ب ئۆمێد ڤە چارڤەرێی زڤڕینا وانن.
دیسا ئەم داخوازا پێكئینانا دادگەهەكا تایبەتمەند ب تاوانێن جینۆسایدێ دكەین، بۆ دادگەهكرن و سزادانا تاوانبارێن داعشێ ل سەر تاوانێن دژی ئێزدیان ئەنجام داین و ئەوا ب سەر ئێزدیان دا هاتی ب جینۆساید بهێتە ناساندن.
رژدیێ ل سەر داخوازیێن جڤاكێ ئێزدی و دام و دەزگەهێن وی دكەین بۆ كرنا بزاڤێن زێدەتر، و دابینكرنا پشتگری و داراییكرنا پێدڤی بۆ تەمامكرنا كاری ل سەر گۆڕێن بەكۆم ئەوێن ماین، و ئەنجامدانا پشكنین و ڤەكۆلینێن تاوانكاری و پاراستنا بەلگەنامەیان ب شێوەیەكی، كو ل گەل مەزناهیا ئەڤێ تاوانێ بگونجیت.
جینۆسایدا ئێزدییان ب تنێ مرۆڤ نەكرینە ئارمانج، بەلكو هەولدانەك بوو بۆ ژناڤبرنا ناسنامە، كەلتوور و ئۆلێ ئێزدییان، لەوران ئەم ل سەر ئەڤێ چەندێ رژدیێ ل سەر پاراستنا مافێن ئۆلی و كەلتووری یێن ئێزدیان د دەستوور و یاسایان دا دكەین.
دیسا ئەم داخوازا دروستكرنا سەنتەرەكێ نیشتمانی یان نێڤدەولەتی دكەین، بۆ تۆماركرنا تاوانێن جنۆسایدا دژی ئێزدیان، كو ب ئەركێ خڕڤەكرنا دیدەڤانێن زندی، بۆ پاراستنا بەلگەنامەیان و تۆماركرنا تاوانان ڕاببیت، دا كو ئەڤ تاوانە د بیرهاتنا نفشێن مەدا و د هشیاری و رایا گشتی یا جیهانێ دا بمینیت.
