د سالەك و نیڤان دا ٧٠٠ خێزانان ئاكرێ بجهـ هێلایە
رەمەزان زەكەریا
قەیرانا نەبوونا خانووێن كرێ ل ئاكرێ گەهشتییە ئاستەكێ مەترسیدار و ب تنێ د دەمێ ١٧ هەیڤێن بووری دا ٧٠٠ خێزانان باژێر بجهـ هێلایە، ئەگەری سەرەكی ژی بۆ كێمییا خزمەتگوزارییان و كێمییا ئاڤاهیێن ئاكنجیبوونێ ڤەدگەرینن.
فەرمان ئەحمەد، وەلاتیەكێ كرێدارە بۆ ئەڤرۆ گۆت: خانیێ كرێ ب زێڕی ژی ل ئاكرێ دەستناكەڤیت، تەنانەت د دوورترین گەڕەكان دا ژی خانوویێ چۆل نینە، دەمێ خانوو نەبیت خەڵك نەچار دبن بار بكەن ژبەر هندێ پێدڤییە دەولەمەند خانوویێن كرێ دروست بكەن، سەرەڕای هندێ كو سەنتەرێ ئاكرێ زۆر بەرفرەهـ بووە و ژ ٤٧ گەڕەكان پێكدهێت، بەلێ ئاریشا نەبوونا خانووێن كرێ چارەسەر نەبووە ئەگەر بالەخانە و خانوویێن كرێ هەبن كرێچی ل باژێرەكێ ناچیت بۆ باژێرەكی دی.
عەبدولسلام محەمەد، خودانێ نڤسینگەها خانووبەران بۆ ئەڤرۆ گۆت: ئێك ژ ئەگەران ئەوە كو د هندەك جهێن نوو دا خزمەتگوزاری نینە و خەڵك ناچنە ئەوان جها، ئەگەرەكێ دی ژی ئەوە كو بها بەراورد دگەل تێچوویێ زۆر كێمن بۆ نموونە خانوویەك كو تێچوویێ وی ٧٠ هەزار دۆلار بن كرێیا وی تنێ ١٥٠,٠٠٠ دینارن، ئەڤێ چەندێ ژی وە كرییە خەلك خانوویێن كرێ دروست نەكەن، بۆیە ئەگەر كو رێژا باركرنا مال و خێزانا ل ئاكرێ بەرەڤ زێدەبوونێ ڤە بچیت.
ل گۆر دووڤچۆنێن هاتیەكرن: ڕۆژانە نێزیكی پێنچ خێزان ل ئاكرێ بار دكەن و بەرەڤ باژێڕێن دهۆك و هەولێرێ دچن، ئەگەرێ سەرەكی ژی بۆ ڤێ كۆچكرنێ دەستنەكەفتنا خانوویێن كرێ یە د ناڤخۆیا باژێری دا.
