ب دەهان سیاسەتمەدارێن کورد دێ ژ ئۆرۆپا ڤەگەڕنە تورکیا
ب، سهرجان مەحمود:
سیاسەتمەدارەکا کورد ل ئۆرۆپا دیار دکەت د چارچۆڤەیێ یاسایا ئاشتیێ دا ب دەهان ئەندامێن بەرێ یێن پەرلەمانێ تورکیا کو نها ل ئۆرۆپا دژین دێ ڤەگەرنە ڤە تورکیا و هەروەسا بەرهەڤی بۆ ڤەگەرا گەلەک سیاسەتمەداران ژی دهێتە کرن.
زوبەیدا زومروت سیاسەتمەدارا کورد ل ئۆرۆپا دیار کر، پشتی یاسایا ئاشتیێ ژ ئالیێ پەرلەمانێ تورکیا ڤە دەرکەڤیت وەکو پێنگاڤا ئێکێ ئەندامێن بەرێ یێن پەرلەمانێ تورکیا و سیاسەتمەدارێن کورد یێن کو ب سالانە ل ئۆرۆپا دژین دێ ڤەگەرنە ڤە تورکیا و ئەو یەک دێ بیتە دەستپێکا قووناغەکا نوو بۆ ڤەگەرا هەموو سیاسەتمەدارێن کورد یێن کو ب سالانە ژ نەچاریێ ل ئۆرۆپا نە و گۆت: (هەکە یاسا دەرکەڤیت و چو ئاستەنگی ژی نەمینن بێگومان دێ گەلەک سیاسەتمەدارێن دی یێن کورد ژی ڤەگەرنە ڤە تورکیا، چونکی ئارمانجا وان خەباتا سیاسی یە و هەکە دەلیڤەیا خەباتا سیاسی ل تورکیا هەبیت و ئاستەنگیێن هەی ژی نەمینن وی دەمی پێدڤی ناکەت چو سیاسەتمەدارێن کورد ل دەرڤەی تورکیا بژین، هەموویان دڤێت ڤەگەرنە ڤە تورکیا و پشکداریێ د کاروبارێن سیاسی دا بکەن).
ناڤهاتیێ ئەو یەک ژی دیار کر، نها بەرهەڤیێن تەمام هاتینە کرن و هەر دەمێ یاسایا ئاشتیێ دەرکەڤیت هژمارەک ژ ئەندامێن بەرێ یێن پەرلەمانێ تورکیا کو ژ بەر فشارێن دەولەتا تورکیا نەچار بوون بەرێ خوە بدەنە ئۆرۆپا دێ ڤەگەرنە ڤە تورکیا و گۆت: (گەلەک هەڤسەرۆکێن باژێرڤانیان و کەسێن سیاسی و سیاسەتمەدارێن بەرێ یێن کو د ناڤ هەدەپێ و دەم پارتیێ دا کار کرینە نها ل ئۆرۆپا نە و چاڤەرێنە کو یاسا دەرکەڤیت، هەر دەمێ یاسا دەرکەفت ئەو دێ ڤەگەرنە ڤە تورکیا و بێگومان نها بەرهەڤی هاتینە کرن).
سیاسەتمەدارا کورد ئەو یەک ژی دیار کر، قووناغا نها تنێ گرێدایی تورکیا یە، کەسێن دێ ڤەگەرنە ڤە تورکیا وەلاتیێن تورکیا نە، یێن کو ب سالانە ژ نەچاریێ ل ئۆرۆپا و ئەمریکا و هندەک وەلاتێن دی دژین، وان دڤێت ڤەگەرنە ڤە تورکیا و پشکداریێ د کاروبارێن سیاسی دا بکەن، بەرهەڤیێن باش ژی هاتینە کرن و گۆت: (پێدڤی بوو بەری نها یاسا دەرکەڤیت، لێ هندەک ئاستەنگی دروست بوون و گیرۆ بوو، ل گۆر زانیاریان دبیت هەتا چەند رۆژێن دی یاسا ئاشتیێ ل پەرلەمانێ تورکیا دەرکەڤیت، دەرکەفتنا یاسایا ئاشتیێ دێ بیتە دەستپێکەکا نوو بۆ هەموو گەلێن تورکیا).
ناڤهاتیێ د دووماهیا ئاخڤتنا خوە دا ئەو یەک ژی دیار کر، وێ دڤێت د گرۆپا ئێکێ دا جه بگریت و ژ ئۆرۆپا ڤەگەریتە ڤە تورکیا، راستە مەترسی هەنە و دبیت بهێنە دەستەسەرکرن ژی و گۆت: (من دڤێت ڤەگەرمە تورکیا و ل تورکیا د ناڤ خەلکی دا بەردەوامیێ بدەمە خەباتا سیاسی، گەلێ کورد دشێت ب خەباتا سیاسی و رێکخستنی بگەهیتە گەلەک مافێن خوە، دڤێت هەر کەس بزانیت کو قووناغا نوو گەلەک زەحمەتیێن خوە هەنە، لێ ژ بۆ سەرکەفتنێ دێ یا پێدڤی کەین).
