نێچیرڤـان بـارزانـی.. بـەرێ خـۆ ددەتـە روودانـان، یـان روودانـان دروست دكەت؟
عەبدولعەزیز محسن بارزانی
جارەكادی كارێزمایێ گەلێ كوردستانێ یێ بوویە دەنگ و باس و بەنیشتێ خۆشێ سەر زمانێ دۆست و نەیاران و كورد و عەرەبان و پشكەكا گرنگیا جڤاكا نێڤدەولەتی.
نێچیرڤان بارزانی سەرۆكێ هەرێما كوردستانێ سەرەدانا دیمەشقا پایتەختێ سوریاكر و هەر ل فرۆكخانێ تاكو كوچكا كۆماری ب مەحفیرێ سۆڕ و پروتوكولێن جودا پێشوازی، لێ هاتیەكرن.
هەلبەتە دەمێ سەرۆكەك پێشوازیێ ل سەرۆكەكێ دی دكەت، بەری هنگی پروتوكۆلێن هەردولایان ل سەر خال ب خالێن پروتوكولێ رێك دكەڤن.
د ڤان كاودانێن سەخت و دژوار دا ئەوێن دەڤەرا رۆژهەلاتا ناڤین تێدا دەرباز دبیت، بتنێ ب بئێك سەرەدان وەكو گەلەك جارێن دی نێچیرڤان بارزانی شیا سەرنجا میدیایێن ناڤخۆیی و نێڤدەولەتی رابكێشیت.
ئەڤ سەرەدانە د خزمەتا مرۆڤایەتیێ و دەڤەرێ و پەیوەندیێن سێقولی یێن د ناڤبەرا هەولێر و بەغدا و دیمەشقێ دا هاتیە ئەنجامدان.
ئەڤ سەرەدانە كانێ چەند بۆ هەولێرێ باش بوویە هند بۆ بەغدا باش بوویە و رەنگە هێشتا باشتر ژی بیت و پاشی بۆ دیمەشقێ باش بوویە. لێ ژ هەمیان باشتر جێبەجێكرنا رێكەفتنا ئەحمەد شەرع و مەزلۆم عەبدی بوویە. دیسا ئەڤێ سەرەدانێ ئارامیەكا دەروونیا مەزن بۆ رۆژئاڤایێ كوردستانێ دروست كر. د ئەڤێ سەرەدانێ دا چەندین گریێن كوورە و ئالۆز هاتنە ڤەكرن و باشتر لێك تێگەهشتن چێ بوو.
رێزدار نێچیرڤان بارزانی وەكو هەر بوویە كلیلا ڤەكرن و چارەسەریا گەلەك پرسگرێكان.
كیش جۆرێن سەرۆكان دەمێ سەرەدانا وەلاتەكێ دكەن دیاری و خەلاتێن جودا جودا ل گەل خۆ دبەن هەلبەتە ئەو سەرۆكێن زێدەتر باوەری د ناڤبەرا وان دا هەیین، یان دێ باوەریا خۆ هێشا موكومتر لێ كەن و دێ ڤیانەكا زێدە د ناڤبەرا وان دا دروست بیت.
پێشكەشكرنا تابلۆیەكێ كەلها هەولێرێ بۆ سەرۆكێ سووریا نیشانا دیرۆك و شارستانیەتا گەلێ كوردستانێ یە و برنا هژیرێن باژێرێ ئاكرێ كو دهێتە نیاسین پایتەختێ نەورۆزێ نیشانا رۆژەكا نوویە د ناڤبەرا هەرێما كوردستانێ و دەولەتا سووریێ دا.
ل گۆرەی پێزانینان هەرێما كوردستانێ مینا هەرێمەكا فیدرال ب ئاگاداریا بەرێز عەلی زەیدی سەرۆك وەزیرێن حوكمەتا ئیرافا فیدرال ئەڤ سەرەدانە هاتیە ئەنجامدان، چونكو بەرێز سەرۆكێ هەرێما كوردستانێ و تیمێ ل گەل دا گەلەك ب باشی ئەڤێ چەندێ دزانن، ڤێجا پێدڤی ناكەت فلان كەس و فلان میدیا و فلان پلاتفۆرما سۆشیال میدیایێ شرۆڤەیێن وەكی وان دڤێت بۆ بكەن.
دێ هێنە سەر دانانا ئالایێ (٩) مەتر یێ كوردستانێ ئەڤە نێزیكێ (١٠٠) سالایە ئالایێ كوردستانێ ل دەولەتا سووریا قەدەغەیە. نەبتنێ د ناڤ رژێما ئەسەدی دا، بەلكو ئەوێن حوكمرانیا رۆژ ئالاڤێ كوردستانێ ژی دكرن ئالایێ كوردستانێ ل دەڤ وان قەدەغە بوو. لێ پشتی رژێما ئەسەدی نەمای و رژێمەكا دی هاتی ب سەرۆكاتیا ئەحمەد شەرع ئالایێ كوردستانێ ل قەدەغەكرنێ هاتە ئازادكرن و پەیامەك ژی دا رۆژئاڤایێ كوردستانێ ئەم ب ڤی رەنگی دێ سەرەدەریێ ل گەل ڤی ئالای و هەلگرێن ڤی ئالایی كەین.
ئەحمەد شەرعی د رێیا دانانا ئالایەكێ (٩) مەتری دا دلێ زێدەتر (٥٠) ملیۆنان كوردان ب خۆ راكێشا. دیسا ئەو وێنێ هەردو سەرۆیان ب هەردو ئالایان هاتیە گرتن و پاشی ناڤێن هەردو سەرۆكان ل سەر هاتینە نڤیسین و هەردو ب سەرۆكان ل بەر چاڤێن هەمی جیهانێ ئیمزا ل سەركرن ئەڤە نیشانا دانپێدانێ یە ب ئالایێ پیرۆزێ كوردستانێ ئەوێ بوویە كفنێ هزاران شەهیدان. من باوەری هەیە كانێ چاوا ئەحمەد شەرع هاتیە داخوازكرن بۆ هەرێما كوردستانێ دێ وەسا چیتە بەغدا ژی بەرێز نێچیرڤان بارزانی دێ بیتە ئەگەرێ ئاسایكرنا پەیوەندیێن بەغدا و دیمەشقێ. كو دەولەتێن جیران زێدەتر دەولەتێن دی پێدڤی ب هەڤدو هەیە بۆ مژارێن سیاسی و ئابووری و ئەمنی و هتد. لەورا ژی دێ بێژم د ڤان كاودانێن ئولۆزدا بەرێز نێچیرڤان بارزانی بتنێ بەرێ خۆ نادەتە روودانێن دەڤەرێ كانێ چ رووددەت. بەلكو كاراكتەرێ دروستكرنا ئەقل و دلی نێزیكێ هەڤدو بكەت و سەرنجا جڤاكێن ناڤخوۆی و نێڤدەولەتی رابكێشیت.
ب هزر و رێك و رێباز و فەلسەفە و كەد و تێكۆشینا رێزدار نێچیرڤان بارزانی دبەم و دكەم. دبێژم ئەزبەنی تو دزانی ئەڤێ سەرەدانا جەنابێ تە خەلك ب كارئێخست و نڤیسكاران گۆتار نڤیسین و شرۆڤەكاران شاشیێن Tv یان تەژیكرن و هندەك سیاسەتمەدار ژی حەیری مان و تووشی شۆكێ بوون و هندەكان ژی وەكو هەرجار ئەڤ چاڤەرێیە ل جەنابێ تە هەبوو. چەندا خۆش و ب تام و ب لەزەتە ئێك روودان هەمی خەلكی مژوول بكەت.
