پشتی 43 سالان هێشتا كەس و كارێن جینۆسایدكریێن بارزانیان نەهاتینە قەرەبووكرن
دوڤچوون، قائید میرۆ
پشتی بۆرینا 43 سالان ل سەر جینۆسایدكرنا هەشت هزار وەلاتیێن بارزانی و دەرچوونا بڕیارا دادگەهێ، هێشتا كەس و كارێن وان نەهاتینە قەرەبووكرن. دیدەڤانەكێ دادگەهیكرنا تاوانبارێن جینۆسایدا بارزانیان دبێژیت: حوكمەتا نوكە یا ئیراقێ میراتگرا حوكمەتێن بەرێ یە و ژلایێ دستووری و قانوونی ئەركێ حوكمەتا نوكەیا ئیراقێ یە بارزانی بهێنە قەرەبووكرن.
مستەفا هەمدلی، ئێك ژ دیدەڤانێن دادگەهیكرنا تاوانبارێن جینۆسایدكرنا بارزانیان بوو ل دادگەها بلندا تاوانێن ئیراقێ بۆ رۆژناما ئەڤرۆ دیار كر «بەری 43 ێ سالان رژێما وی دەمی یا بەعسیان هەشت هزار وەلاتیێن سڤیل یێن بارزانی جینۆسایدكرن و ب شێوەیەكێ زۆر هۆڤانە هاتنە ژناڤبرن، تاوانا بارزانیان تنێ ئەوبوو كوردبوون و چو تاوانەك ل سەر نەبوو، مخابن هەموو وەلاتیێن رەگەزێ نێر یێن بارزانی ل سنێلەكێ 11 سالی هەتا دانعەمرەكێ 100 سالی دناڤا ئەنفالێن بارزانیاندا هەبوون.
زێدەتر گۆت: پشتی پرۆسا ئازادیا ئیراقێ و دامەزراندنا دادگەها بلندا تاوانان مە سكالا تۆماركر و مینا زۆر بادەكێن دی بادەكا بارزانیان چو دادگەهێ تاوانبار هاتنە دادگەهی كرن، سەرەڕای هەبوونا بڕیارا دادگەهێ هێشتا كەس و كارێن جینۆسایدێن بارزانی نەهاتینە قەرەبووكرن، ئەڤە د دەمەكی دایە حوكمەتا نوكەیا ئیراقێ میراتگرا حوكمەتێن بەرێ یە و هەر ئەڤی چوارچوڤەی دا چەندین قەرێن ل سەر دەمێ بەعسیان بۆ وەلاتێ كوێتێ هاتینە ڤەگەڕاندن، چونكە ل گۆرەی قانوون و دستووری حوكمەتا نوكەیا ئیراقێ بەرپرسیارە، لەوڕا ئەم داخواز دكەین گڤاشتن لسەر حوكمەتا فیدڕال بهێنەكرن و بهێتە نەچاركرن پێگیریێ ب فەرمانا دادگەهێ بكەت.
نازدار بارزانی، بابێ وێ دگەل هەشت هزار بارزانیان لسالا 1983ێ هاتیە جینۆسایدكرن بۆ رۆژناما ئەڤرۆ گۆت «ئەڤا هەمبەر مللەتێ بارزان و بارزانیان هاتیەكرن ئێك ژ تاوانێن زۆر نەمرۆڤانە بوویە لسەر ئاستێ جیهانێ، ژبەركو كەس و كارێن مە بێی چو تاوانەك هاتینە زیندەبەچالكرن و شەهیدكرن، دەمێ بابێ من هاتیە جینۆسایدكرن مە گەلەل زارۆكێن بارزانیا تەمەنێ بچووك هەبوو هندەك ژوان بابێ خۆ نەدیتیە و پشتی بابێ خۆ هاتینە دنیایێ، دایكێن مە هەم ببوونە باب هەم دایك بوون، د رەوشەكا زۆر پەریشان و تژی دەردەسەری ئەم گەهاندینە ئەڤرۆ، كارەسات هەر تنێ جینۆسایدكرنا كەس و كارێن مە نەبوو، پشتی گرتنا مرۆڤێت مە هەموو ئەو كۆمەلگەهێن ب زۆرە مللی هاتینە ئاڤاكرن و خێزانێن بارزانیا تێدا ئاكنجی هاتبوونە دۆر پێچكرن و تنێ ئاڤژی بۆمە قەدەغەبوو، واتە پشتی دەستەسەركرنا باب و كەس و كارێن مە مافێ ژیانێ ژ ل خێزان و زارۆكێن وان هاتبوو قەدەغەكرن.
حازم بلەیی، چالاكڤان و نڤیسەرێ جینۆسایدا بارزانیان بۆ رۆژناما ئەڤرۆ دیار كر «پشتی تێچكوونا شۆڕشا كورد ب پیلان رژێما وی دەمی یا ئیراقێ هەموو خەلكێ دەڤەرا بارزانی ڤەگوهاست بۆ باشوورێ ئیراقێ و هژمارەك كۆمەلگەهێن دەوروبەرێ هەولێرێ، پشتی چەند سالان یێن باشوورێ ئیراقێ دوبارە هاتنە ڤەگوهاستن بۆ دەوروبەرێ هەولێرێ و ب پیلانەكا بەروەخت بڕیار ل سەر هاتیەدان د دەمێ چەند رۆژێن كێم هەشت هزار وەلاتیێن بارزانی هاتنە جینۆسایدكرن، ڤەگوهاستنا بارزانیان زیانێن زۆر گەهاندن خەلكێ دەڤەرێ، چونكە زۆربەیا وان جۆتیاربوون و مژوولی ژیانا خۆیا رۆژانەبوون، كۆمكرنا وان دناڤا هژمارەك كۆمەلگەهێن دەوروبەرێ هەولێرێ كاریگەریێن نەرێنی كرە سەر جڤاكێ بارزانیان و بێكارمابوون، سەرەڕای ڤێ چەندێ ژی زەلام هاتنە جینۆسایدكرن و تنێ ژن و زارۆك مان، ژلایێ ئابوری ڤە ژیانا وی دەمێ زۆر یا دژواربوو، چونكە چوكار نەبوون ژنێن بارزانی ب سەر بلندی شیان كارەكی پەیدا بكەن بۆ رێڤەبرنا زارۆكێن خۆ، حوكمەتا هەرێما كوردستانێ مووچە بۆ كەس و كارێن وان مەزاختینە و پارچێن ئەردی و خانی لسەر هاتینە بەلافكرن، بەلێ حوكمەتا ئیراقێ كو بەرپرسیارە ل هەمبەر قەرەبووكرنا بارزانیان هەتا نوكە چو پێنگاڤ نەهاڤێتینە بۆ قەرەبووكرنا كەس و كارێن وان.
