سەرۆكێ دەستەیا وەبەرهێنانێ: مۆهلەتا 160 پڕۆژەیێن وەبەرهێنانـێ هاتیە هەلوەشاندن
سەرۆكێ دەستەیا گشتیا وەبەرهێنانێ ل هەرێما كوردستانێ ئاشكراكر، ئەڤ سالە زێدەتری 100 مۆهلەت ب پڕۆژەیێن وەبەرهێنانێ هاتینەدان و دبێژیت: ل سالێن بۆری و ژبەر نەپێگریا وەبەرهێنەران، مۆهلەتا 160 پڕۆژەیێن وەبەرهێنانێ هاتیە هەلوەشاندن.
دكتۆر محەمەد شوكری، سەرۆكێ دەستەیا گشتیا وەبەرهێنانێ بۆ رۆژناما ئەڤرۆ دیاركر، ئەڤ سالە ل سەرانسەری هەرێما كوردستانێ، مۆهلەت ب زێدەتری 100 پڕۆژەیێن وەبەرهێنانێ هاتیەدان، پڕانیا وان ژی پڕۆژەیێن بازرگانی و چاندنێ و پیشەسازینە و گۆت: «ژ سالا 2024ێ وەرە دانا مۆهلەتێ ب پڕۆژەیێن ئاكنجیبوونێ هاتیە راگرتن، ئەو پڕۆژەیێن ئاكنجیبوونێ یێن نوكە دهێنە ئەنجامدان، ئەون یێن بەری نوكە مۆهلەت وەرگرتی، چونكی ل دو سالێن بۆری چو مۆهلەت ب پڕۆژەیێن ئاكنجیبوونێ نەهاتینەدان، ب تنێ ل جهێن پێدڤی هەبیت دێ مۆهلەت ب پڕۆژەیێن ئاكنجیبوونێ هێتەدان».
گۆت ژی: «ژبەر خەمساری و نەپێگریا وەبەرهێنەران، مۆهلەتا 160 پڕۆژەیێن وەبەرهێنانێ هاتیە هەلوەشاندن، چونكی هەر پڕۆژەیەكێ د دەمێ قانوونی دا دەست ب كاری نەكەت، پێداچوون ب مۆهلەتا وی دێ هێتە كرن و ئەگەر هەر پێگیر نەبوو، دێ مۆهلەت هێتە هەلوەشاندن».
