پڕۆژەیەكێ نوو یـێ خزمەتگوزاری ل زاخـۆ كەفتە د وارێ بجهئینانێ دا
زاخۆ، دلۆڤان هالۆ:
یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر كو ژ بۆ پێشئێخستنا ژێرخانا باژێڕی و پێشكێشكرنا خزمەتگوزاریێن باشتر بۆ وەلاتیان، وان دەست بجهئینانا پڕۆژەیەكێ نوو یێ خزمەتگوزاری ل تاخێ تلكەبەرێ ل زاخۆ كریە.
سەرۆكێ باژێڕڤانیا زاخۆ گۆت: «ئەڤ پڕۆژە ژ چێكرن و قێركرنا جاددەیێن تاخێ تلكەبەرێ ب درێژاهیا هەشت كیلۆمەتران و چێكرنا سۆلینێن ئاڤڕێژ ب درێژاهیا 450 مەتران پێك دهێت، مەرەم ژێ ئەوە، مەترسیا كۆمبوونا ئاڤا بارانێ و دروستبوونا لەهیان ل سەر تاخی نەمینیت، دیسا نووژەنكرنا هێلێن ئاڤێ و كارەبێ، داكو ل گەل گەشەكرنا ئاكنجیبوونا تاخی بگونجن».
گۆت ژی: «ئارمانجا سەرەكی ژ ڤی پڕۆژەی باشتركرنا خزمەتگوزاریێن بنەڕەتی یێن ڤی تاخی یە، كو دێ بیتە ئاسانكاریەكا مەزن د هاتنوچوونا ڕۆژانە یا وەلاتیێن تاخێ تلكەبەرێ دا و سیمایەكێ شارستانی ژی دێ دەتە باژێڕێ زاخۆ».
