هەشت باخچەیێن نوو ل سنۆرێ ئیدارەیا سەربخوە یا زاخۆ هاتینە دروستكرن
زاخۆ، دلۆڤان هالۆ
د كابینا نەهێ یا حكۆمەتا هەرێما كوردستانێ دا گەلەك پڕۆژەیێن گرنگ یێن خزمەتگۆزاری ل ئیدارەیا سەربخوە یا زاخۆ هاتینە ئەنجامدان، ب تایبەت د كەرتێ باژێڕڤانیێ دا وەكو چێكرنا سۆلینێن ئاڤڕێژ و قێركرنا جاددەیان و د كەرتێ پەروەردێ دا وەكو ئاڤاكرن و نووژەنكرنا قوتابخانان.
یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر، د كابینا نەهێ یا حكۆمەتا هەرێما كوردستانێ دا گەلەك پڕۆژەیێن خزمەتگۆزاری ل ئیدارەیا سەربخوە یا زاخۆ هاتینە ئەنجامدان، وەكو قێركرن و سەخبێریكرنا جاددەیێن گۆندان ب درێژاهیا 2٨٥ كیلۆمەتران و چێكرنا سۆلینێن ئاڤڕێژ ب درێژاهیا 13٤ كیلۆمەتران، و كێمكرنا ڕێژەیا جاددەیێن نە قێركری ل سەنتەرێ باژێرێ زاخۆ ژ ٦٥٪ بۆ 1٥٪ێ.
سەرۆكێ باژێڕڤانیا زاخۆ، ئاماژە ب وێ چەندێ ژی كر، ٨ باخچەیێن نوو ل سنۆرێ ئیدارەیا سەربخوە یا زاخۆ هاتینە دروستكرن، 10 باخچە ل زاخۆ و باتیفا هاتینە نووژەنكرن و چێكرنا چەندین ڕێكێن هاتنوچوونێ وەكو چوارڕیان و ئەندەرپاسان، چێكرنا چەندین پاركێن راوەستاندنا تڕۆمبێلان، هەر دیسا نەهێلانا ترافیك لایتان و هێلكرنا جاددەیان كو بوویە ئەگەرێ كێمبوونا ڕوودانێن هاتنوچوونێ ب ڕێژەیا 60٪، و بۆیاغكرنا هێلكاریێن جاددەیان ب درێژاهیا ٤9٤ كیلۆمەتران، و بۆیاغكرنا هێلكاریێن پیادەیان ل سەر ڕووبەرێ 1٥ هزار مەترێن دووجا.
سەلام پیرۆ، ڕێڤەبەرێ گشتی یێ پەروەردا زاخۆ گۆت:»ل سەر راسپاردێن مەسرور بارزانی سەرۆكێ حكۆمەتا هەرێما كوردستانێ، د كابینا نەهێ یا حكۆمەتێ دا چەندین پڕۆژەیێن گرنگ د كەرتێ پەروەردێ دا هاتینە ئەنجامدان، وەكو ئاڤاكرنا ٦ قوتابخانێن 18 ڕێزی و ٤ قوتابخانێن 12 ڕێزی و 2 قوتابخانێن ٦ ڕێزی، هەر دیسا نووژەنكرن و زێدەكرنا پۆلان ل ٦٥ قوتابخانە و باخچەیێن زاڕۆكان».
