دادگەھ دشێت ب قست پارەیێ کەفالەتێ وەربگریت
بێوارحەمدی:
پارێزەرەکی بۆ ڕۆژنامەیا ئەڤرۆ دیار کر کو ل گوڕەی پێڕابونێن دادگەهکرنا سزای، ئەگەر کەفیلی تومەتبار ئامادە نەکر ل وی دەمی دێ بیتە سەرپێچی و دادگەھ دشێت ب شێوەیێ قست پارەیێ کەفالەتێ ژ کەفیلی وەربگریت.
پارێزەر نەوزاد موستەفا دیار کر کو سیاسەتا تەشریعی پشتگەرمیا شێوازێ ڕەفتارکرنێ دگەل تاکی کریە ب بەردانا تۆمەتباری ب کەفالەت، ئەڤجا چ ب ڕێیا پارەی بیت یان ژی کەسەک ببیتە کەفیلێ وی. گۆتژی: گەلەک جاران ل دەمێ ژڤانێ دادگەهکرنێ تۆمەتبار یان کەفیلێ وی ئامادە نابن، ئەڤجا چ ژبەر ئەگەرەکێ ڕەوا بیت یان ژی ژبەر خەمساریێ.
پارێزەری ئەو چەندە ژی دا زانین کو ل گوڕەی پێڕابوونێن دادگەهکرنا سزایی، ئەگەر کەفیلی تۆمەتبار ئامادە نەکر ل سەر داخوازیا دادوەرێ ڤەکۆلینێ، ل وی دەمی دێ بیتە سەرپێچی ل سەر سۆز و کەفالەتا وی دای، هەروەسا دادوەری ماف هەیە بڕیارا ڕەوانەکرنا کەفیلی بۆ دادگەها کەتنێ بدەت.
پارێزەر نەوزاد گۆتژی؛ ئەگەر کەفیل نەشیا تۆمەتباری ئامادە بکەت، دادگەھ دشێت کۆژمێ پارەیێ کەفالەتێ هەموویێ یان بەشەک ژێ ژ کەفیلی وەربگریت ل دووڤ کاودانێن گشتی.
پارێزەری د بەردەوامیا ئاخفتنێن خۆ دا دیار کر کو دادگەهێ ئەڤ مافە ژی هەیە کو کەفیلی ژ دانا پارەی عەفو بکەت، ئەگەر ئامادە نەبوونا وی ژ ئەگەرەکێ ڕەوا بیت، یان ژی دشێت ب شێوەیێ قست پارەیێ کەفالەتێ ژ کەفیلی وەربگریت، لێ ب وی مەرجی کو دڤێت بۆ ماوەیێ نە زێدەتر ژ سالەکێ وی پارەی بدەت و گۆت؛ ئەگەر هات و سەرپێچی کر، ل دووڤ ماددەیێ (١١٤) دێ دەست ب سەر مال و ملکێن وی دا هێتە گرتن یان فرۆشتن ل گوڕەی یاسایا جێبەجێکرنێ.
