بەرنیاسێن تۆڕێن جڤاكی ل زاخۆ نابیت بێی دەستووری ڕیكلامێ بكەن
زاخۆ، دلۆڤان هالۆ:
ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ دیاركر، ئێدی بێی دەستووریا ڕێڤەبەریا چاڤدێریا بازرگانی ل زاخۆ، بەرنیاسێن تۆڕێن جڤاكی و هەر كەسەكێ دی ژی نابیت ب چ ڕەنگان و ل دووڤ حەزا خوە ڕیكلامێ بۆ كەرەستەیێن بازرگانی و بابەتێن داشكاندنێ بكەن.
كۆڤان ئاڤدەل، ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ، بۆ ڕۆژناما ئەڤرۆ دیاركر، هەر كەسەكێ بڤێت ڕیكلامێ بكەت ل دەستپێكێ پێدڤیە سەرەدانا ڕێڤەبەریا مە بكەت، و دەستویریێ ژ مە وەرگریت و ڕێنومایێن مە بجهـ بینیت، پاشان ڕیكلاما خوە بكەت.
گۆت ژی:»ئەو كەسێ ڕیكلامێ بكەت دڤێت شارەزایی د بیاڤێ ڕیكلامكرنێ دا هەبیت و زانیاری ل سەر وی بەرهەمی هەبن یێ ڕیكلامێ بۆ بكەت، هەردیسا دڤێت سۆزنامەیەكێ ئیمزا بكەت كو بەرپرس بیت ژ هەر ئاریشەیەكا دەربارەی ڤی بابەتی دهێتە پێش».
زێدەتر ژی گۆت:»هەر كەسەكێ بیێ دەستووریا مە ڕیكلامێ بكەت دێ پێڕابوونێن یاسایی ل گەل هێنە وەرگرتن و دێ هێنە ڕەوانەكرن بۆ دادگەهێ».
