پێكهاتنا كابینەیا نوی و كاراكرنا پەرلەمانی؛ پێدڤییەكا نەتەوەیی یە بۆ بهێزكرنا قەوارەیێ هەرێمێ
ئاشتی سالح
ژبەركو گیرۆبوون و پاشكەفتنا پێكهاتنا كابینەیا نوی یا حوكمەتا هەرێما كوردستانێ و كاڕاكرنا پەرلەمانی ڕۆژ بۆ ڕۆژێ كاریگەرییێن نەرێنی ل سەر ژیانا خەلكی و ڕەوشا گشتی دروست دكەت، فەرە هەموو حزبێن كورستانی، بەری هەموویان پارتی دیموكراتی كوردستان و یەكێتییا نیشتمانییا كوردستان، ب لەزەكا مەزن كۆم ببن و دەمەكی دیار بكەن بۆ پێكهاتنا حوكمەتێ و كاڕاكرنا پەرلەمانی. چنكو ئەڤ گیرۆبوونە چ جاران نە د بەرژەوەندیا چ لایەنەكێ دایە، بەلكو زیانەكا مەزنە بۆ هەموو حزب و لایەنان بێ جوداهی.
ب كاڕاكرنا پەرلەمانی و پێكهاتنا كابینەیا حوكمەتا هەرێما كوردستانێ، دێ شەرعیەتەكا قانوونی و ئیداری یا مەزن دەتە قەوارێ هەرێما كوردستانێ، و ئەڤ چەندە دێ دبیتە سەدەم كو هەرێم پتر سەنگ و بها و ڕۆلێ خۆ ل ئیراقێ و سەر تەمامێ ناڤچەیێ هەبیت. هەروەسا، ڕەوشا سیاسی و داڕایی یا وەلاتییان پێدڤی ب بڕیارێن لەز و كۆمبوونێن چارەنڤێساز هەیە، داكو دەمژمێرێن بەرزەبوویی و بڕیارێن ڕەق ب سەر ڤی كورسی و دەستهەلاتێ نەهێنە گرتن. ژبەر وێ ئێكێ، هەكە لایەنێن سیاسی ب ڕژدی و دلسۆزی مۆركا رێككەفتنێ داننە سەر ڤان كەیسان، دێ دەرگەهەكێ نوو بۆ گەشەپێدانێ و ئارامیێ ل هەرێمێ ڤەبیت و پاشەڕۆژا گەنج و وەلاتییێن مە ب پارێزەری بمینیت.
گوهۆڕین و پێشكەفتنێن ب لەز سیاسی ل دەڤەرێ و پێدڤیێن ڕژد یێن ناڤخوەیی، دبەنە سەر وێ چەندێ كو دەمێ چاوەڕێكرنێ ب دووماهی هاتییە و چ ئوجە بۆ پاشخستنا پتر یا ڤان پرۆسەیان نەمایە. خەلكێ هەرێما كوردستانێ ب گشتی و گەنج ب تایبەتی، هیڤی و پاشەڕۆژا خو ل سەر سەقامگیرییا سیاسی و ئابووری ڕادوەستینن. هەكە لایەنێن سەرەكی ل سەر مێزا دانوستاندنێ بڕیار بدەن بەرژەوەندیا گشتی بێخنە سەری هەمی تشتێن پارچەیی، بێگومان دەرفەتێن مەزن دێ بۆ چارەسەركرنا كێشەیان چێبن. ژبەر وێ یەكێ، پێدڤیە هەستیارییا قووناغێ بێتە زانین و ژناڤبرنا كۆسپێن سیاسی بێتە كرن، داكو دەزگەهێن فەرمی ب زویترین دەم دەست بكاربن و ئارامییەكا بەردەوام بۆ دەڤەرێ بهێتە مسۆگەركرن.
هەروەسا، دڤێت ئەم بزانین كو پاشخستنا زێدەتر یا ڤی پرۆسەیی تنێ بارگرانییەكا دەروونی و دارایی ل سەر ملێن تاك بە تاكێ ڤی مللەتی زێدە دكەت. هەر لایەنەكێ سیاسی ئەڤڕۆ بەرپرسە ژ پاراستنا قەوارەیێ هەرێمێ، و ئەڤ بەرپرسیارەتییە داخواز ژ هەمیان دكەت كو ب دەستپێشخەرییەكی نوو بگەهنە ڕێككەفتنەكا گشتگیر. داكو مە شیان هەبن روو بە رووی تەحەددیێن نوو ببین، پێكئینانا حوكمەتەكا ب هێز و چالاككرنا پەرلەمانی ببنە ئارمانجا سەرەكی یا هەمی سەركردایەتییان، چنكو پاراستنا دستووری و قانوونی یا ڤی هەرێمی پشتەڤانا هەرە مەزنە بۆ مانەوە و پێشكەفتنا مللەتێ مە.
