ههردی دو كارێن هونهری ل فێستیڤالهكا هونهری ل سویدێ دێ پێشكێش كهت
هونهرمهندێ مۆزیكژهن، ههردی كورده دێ دوو كارێن هونهری یێن دهنگی ب ناڤێن ههماههنگییا ته و بكارئینانا تشتان ل فیستیڤالا هونهرێ دهنگی ل گۆتهنبهرگ ل وهلاتێ سوید پێشكێش كهت.
ناڤهاتی گۆت ژی: كارێ من یێ هونهری ب تنێ د چارچووڤێ سنوورێن مۆزیكێ دا نینه، بهلكو ئهز بزاڤان دكهم ماددێن دهنگی یێن غهریب و ئاماژهپیكری، بێدهنگیێن نهچاڤهرێكری و دهنگێن ئالۆز كۆم بكهم و ب رێكا ئامیرێن وهرگرتنا هێمایێن رادیۆیی و ئامرازێن دهنگی یێن جودا، شیوازهكێ جودا یێ ئهزموونا گوهلێبوونێ دروست بكهم.
ههردی گۆت ژی: كارێ من یێ هونهری د ناڤبهرا داهێنان و دروستكرنا دهنگی دا ل دهمێ پێشكێشكرنێ، پێكئینانا بهرههمێن دهنگی و نیشاندانا دهنگی دایه، د كارێن خۆ دا گرنگیێ ب وان دهنگان ددهم یێن كو ژ ژینگههێ و دهوروبهران دهێن، كو هندهك جاران ژ سنوورێن دهرڤه دچن ئهوێن ب ڤی رهنگی وهكو موزیك نیاسی، ڤی كارێ من ژ یاداشتێن پشكنینا ساخهمییا دایكاتیێ ژێدهر وهرگرتیه و ب رێكا دهنگی پهیوهندییا دناڤبهرا جهستهی، بیرهوهری و ههستان دئێخمه بهردهست و ل دهمێ پێشكێشكرنێ ئهز ئامیرێ پشكنینا كاركرنا دلی، ههناسه و دهنگێن ژێر دهنگی ب كار دئینم، ههروهسا زانیاریێن لێدانا دلێ پشكداربوویان ب شێوازهكێ راستهوخۆ دهێنه گوهۆڕین بۆ ئهنجامهكێ دهنگی و دبنه پشكهك ژ پرۆسا پێشكێشكرنا من.
ناڤهاتی ئهو ژی دیاركر: ل ههماههنگییا ته دا سهرنجا من یا سهرهكی ل سهر وێ چهندێیه چاوا ئهم دشێن جهسته و بیرهوهریێ ب رێكا دهنگی ڤه گرێبدهین، لێدانا دلێ پشكداربوویان ب تنێ زانیارییهكا ساخلهم نینه، بهلكو دشێت ببیته پشكهك ژ زمانێ دهنگی و هونهریێ من یێ پێشكێشكرنێ، ههروهسا د كارێ دووێ دا، كو بكارئینانا تشتانه، ئهز تشتین دیتی و بكارهاتی دكهمه ژێدهر بۆ دروستكرنا دهنگی، ل ڤێ كارگهها فێركاری دا، تشتێن دهوروبهر و ماددێن بكارهاتی، ل جهێ ب تنێ وهكو تشتهكێ ب بوها بهێنه دیتن، دبنه كهرهستهكێ هونهری بۆ دروستكرنا دهنگی و نهخشهسازییا جههكی.
ههردی كورده دبێژیت ژی: د بكارئینانا تشتان دا من دڤێت سهرنج ل سهر تشتێن ساده و بكارهاتی یێن دهوروبهران بن، ئهوان تشتان ژی دشێن دهنگێ خۆ ههبن و ببنه پشكهك ژ پێكئینانا بهرههمهكێ دهنگی، ئهڤه پهیوهندییهكا نوو د ناڤبهرا مرۆڤی، ژینگههێ و گوهلیبوونێ دا دروست دكهت.
فیستیڤالا هونهری یا دهنگێ گۆتهنبهرگ، كو ههردی كورده تێدا دێ ههر دوو بهرههمێن خۆ پێشكێش كهت.
ههردی كورده موزیكژهنهكێ كورده، د وارێ مۆزیكا ئهزموونی و هونهرێدهنگی یێ خۆدان شیانه، وی دكتۆرا د موزیكێ دا ل زانكۆیا گۆلدسمیس ل لهندهن وهرگرتییه و ب كاركرنا ل سهر دهنگێن غهریب و پشتگوهخستی یێ ناسیاره، ههروهسا ناڤهاتی دامهزرێنهرێ پلاتفۆرم و فیستیڤالا سپهیس21 و پرۆژێ ئهرشیف خانه دامهزراندیه بۆ كۆمكرن و پاراستنا دهنگ و مۆزیكا كوردستانێ.
