بۆ جارا ئێكێ فێستیڤالەكا جیهانی بۆ (دۆمان) ل هەولێرێ دێ هێتە گێڕان
شاكر ئەتروشی
سەرۆكێ رێكخراوا (سەرەد) بۆ پاراستنا مافێن قەرەچان ل هەرێما كوردستانێ و ئیراقێ، دیاركر كو ئەڤە دەمەكە ئەو یێ بەرهەڤیێن خۆ دكەن ژبۆ گێڕانا فێستیڤالا ئێكێ یا قەرەچان (دۆم) كو دێ د هەیڤا نیسانا سالا بهێت دا ل هەولێرێ هێتە گێڕان و دەمێ فێستیڤالێ دو رۆژن.
هونەرمەند(عابد دهۆكی) سەرۆكێ رێكخراوا (سەرەد) بۆ پاراستنا مافێن قەرەچان ل هەرێما كوردستانێ و ئیراقێ، بۆ رۆژنامەیا ئەڤرۆ گۆت: ئەم وەك رێكخراوا (سەرەد) دێ ب ئەنجامدانا ڤێ قیستیڤالێ ڕابین، دەمێ فێستیڤالێ دو رۆژن، ل رۆژا ئێكێ كو دێ ل هولا شەهید (سەعەد عەبدوللا) هێتە گێڕان، پشتی خواندنا چەند پەیڤان دێ بەلگە فلمەك ل دۆر ژین و ژیارا قەرەچێن كوردستانێ هێتە نیشادان، هەروەسا نامیلكەیەك ژی ل دۆر كارێن دەستی یێن (دۆمان/قەرەچان) هاتیە ئامادەكرن دێ ل وێ رۆژێ ل سەر بەرهەڤبوویان هێتە بەلاڤكرن، ل رۆژا دویێ ژی دێ (50) خیڤەت هێنە دانان و دێ ل بن هەر خیڤەتەكێ چەند كەسەك هێنە دانان كو كارسازیێ دكەن، وەك چێكرنا لاندكان و تیرۆك و خانكان و بستك و … هتد و مە ل بەرە ل رۆژا 8/4/2027 كو رۆژا جیهانی یا دۆمانە دەست ب گێڕانا فێستیڤالێ بكەین و بەرنامەیەكێ باش بۆ وان هەردو رۆژان ئامادەكریە و دێ پێشكێشی نڤیسینگەها رێزدار (مەسرور بارزانی) سەرۆكێ حكومەتا هەرێما كوردستانێ كەین ب مەرەما دابینكرنا پشتەڤانیا درایی و ئەم دگەشبینین دێ پشتەڤان بن، چنكو هەردەم سەرۆكێ حكومەتێ و پارتی پشتەڤانێن پێكڤە ژیانێ نە و هەرێما كوردستانێ ژی هەردەم مالا هەموو ئۆل و نەتەوە و ئاینان بوویە، لەورا ب وارگەهێ پێكڤە ژیانێ دهێتە نیاسین.
ل دووماهیێ گۆت: بۆ ڤێ فیستیڤالێ دۆم ل هەرێما كوردستانێ و ئیراقێ، هەروەسا ل هژمارەكا وەلاتێن عەرەبی و ئورۆپی ژی هێنە داخوازكرن، زێدەباری هژمارەكا كەسێن ئەكادیمی و بسپۆر و هژمارەكا پەنەل و سمیناران ل دۆر ڕەوشا دۆمان د هەر بۆارەكی دا ل هەرێما كوردستانێ و ئیراقێ و ئورۆپا هێنە پێشكێشكرن.