هەژمارەكا جادەیان ل دێرەلۆكێ دهێنە بجهئینان
ئامێدیێ، مەحمود نهێلی:
د بەردوامیا گەهاندنا پڕۆژەیێن خزمەتگوزاری دا بۆ دەڤەرێ، هەژمارەكا جادەیێن ناڤخۆیی ل سنۆرێ باژێرڤانیا دێرەلۆكێ دهێنە چێكرن و گوژمێ پێدڤی بۆ هاتیە تەرخانكرن.
ئەندازیار عەبدولمەناف رەشید، سەرۆكێ باژێرڤانیا دێرەلۆكێ بۆ رۆژنامەیا ئەڤرۆ دیار كر، ل سەر دەمێ كابینەیا نەهێ یا حكومەتا هەرێما كوردستانێ رازیبوون ل سەر چێكرنا هەژمارەكا زۆرا پڕۆژەیان ل سنۆرێ دەڤەرا وان هاتیە كرن و گۆت: «ژ وان پڕۆژەیان ژی چێكرنا جادەیێن ناڤخوەیی نە، ل سنۆرێ باژێرڤانیا دێرەلۆكێ ژی هەژمارەكا زۆرا جادەیان هاتینەچێكرن و دووماهی پڕۆژە ژی دەست پێ هاتیە كرن، كو چێكرنا جادەیێن تاخێن ئازادی و داستان و شەهیدانن».
ناڤهاتی گۆت ژی: «گوژمێ ئێك ملیار و 150 ملیۆن دیناران بۆ ئەنجامدانا ڤی پڕۆژەی هاتینە تەرخانكرن و نوكە دۆرێن 40% ژ پڕۆژەی هاتیە چێكرن و ب دووماهی هاتنا ڤی پڕۆژەی دێ خزمەتەكا باش یا ئاكنجیێن وان تاخان هێتە كرن».
