بەرهەمێ هنگڤینێ كوردستانێ ب ڕێژەیا 20%ێ زێدە بوویە
رەمەزان زەكەریا:
وەزارەتا چاندنێ و ژێدەرێن ئاڤێ یا حكومەتا هەرێما كوردستانێ دیاركر كو بەرهەمێ هنگڤینی ئەڤ سالە ب ڕێژەیا 15 هەتا 20%ێ هەمبەر پار زێدە بوویە.
قارەمان قادر، پەیڤدارێ وەزارەتا چاندنێ و ژێدەرێن ئاڤێ ڕاگەهاند كو پێشبینی دهێتە كرن بەرهەمێ ئەڤ سالە بگەهیتە 550 هەتا 600 تەنان، ئەڤە د دەمەكی دایە، پار 450 هەتا 500 تەنان بوون و گۆت: «ئەڤ ڤەژاندنە بۆ رەوشا كەشوهەوای و بهارا بۆری ڤەدگەڕیت، دیسا ل سالا 2024 ژێ نێزیكی 645 تەنێن هنگڤینی هاتبوونە بەرهەمئینان».
ناڤبری گۆت ژی: «هنگڤینێ كوردستانێ خودان پلەیا نایاب و نێڤدەولەتییە و ناڤدارترین جۆرێن وی پێكهاتینە ژ كیڤی، بەڕوویێ و فرەگول، دەڤەرێن سەرەكی یێن بەرهەمئینانا هنگڤینی ل كوردستانێ، ل پارێزگەها دهۆكێ: دەڤەرێن ئامێدیێ، دینارتە و زاخۆنە، ل پارێزگەها هەولێرێ و ئیدارەیا سەربخۆ یا سۆران: دەڤەرێن چۆمان، بالەكایەتی، سیدەكان و ڕواندزن و ل پارێزگەها سلێمانیێ ژی: دەڤەرێن پێنجوێن، ماوەت، قەرەداخ و شارباژێڕن».
ناڤهاتی زێدەتر گۆت: «وەزارەت ئاسانكاریان بۆ ب بازاڕكرن و هنارتنا هنگڤینی دكەت و دەرمانێ نەخۆشیا ڤاروا دابین دكەت».
