دو ده‌رهێنه‌رێن كورد ل وه‌لاتێ هندستانێ به‌ریكانا ب ده‌ستڤه‌ئینانا خه‌لاتان دكه‌ن
ره‌مه‌زان زه‌كه‌ریا:
دو ده‌رهێنه‌رێن كورد، جوبرائیل ئه‌بوبه‌كر و سامی كاكه، ب هه‌ر دو كورته فلمێن ده‌ریای هیوا و شاخی بێده‌نگ، ل فیستیڤالا نێڤده‌وله‌تی یا فلمێن ئه‌حمه‌د ئاباد ل وه‌لاتێ هندستانێ به‌ریكانا ده‌ستڤه‌ئینانا خه‌لاتان دكه‌ن.
جوبرائیل ئه‌بوبه‌كر، ده‌رهێنه‌رێ كورته فیلمێ ده‌ریای هیوا بۆ ئه‌ڤرۆ گۆت: هه‌ر دو كورته فیلمێن ده‌ریای هیوا كو ده‌رهێنانا منه و فلمێ شاخی بێده‌نگ ژ ده‌رهێنانا سامی كاكه‌یه، ده‌مێ پتر ژ ساله‌كێ دا ل نزیكی 60 فیستیڤالێن نێڤده‌وله‌تی پشكداری كرییه و مه شیایه چه‌ندین خه‌لاتێن جیاواز ب ده‌ست ڤه بینین، كو ئه‌ڤه ژی نیشانا ئاستێ باش یێ به‌رهه‌مان و شیانێن سینه‌ماكارێن كورده ل ناڤ مه‌یدانا جیهانی دا.
ناڤهاتی گۆت ژی: فلمێ شاخی بێده‌نگ ژ لایێ من ڤه بۆ فیستیڤالێن نێڤده‌وله‌تی هاتییه فرێكرن و ژ ئه‌ڤرۆ و پێدا فیلمێن ڕێڤه‌به‌راتیا سینه‌ما یا هه‌ولێرێ ب ڕێیا من بۆ فیسیڤالێن نێڤده‌وله‌تی دێ هێنه فرێكرن، ئه‌ڤه ژی به‌لگه‌یه‌كه ل سه‌ر گه‌شه‌یا سینه‌ما یا كوردستانێ و به‌رفره‌هبوونا ئاستێ ناساندنا به‌رهه‌مێ سینه‌مایی یێ كوردی ل سه‌ر ئاستێ جیهانێ.
ناڤهاتی ئاشكرا كر کو هه‌ر دو فیلم چیرۆكا مرۆڤانه كو ب ئه‌گه‌رێ جه‌نگ و نه‌ئارامیێ نه‌چار دبن گوندێ خوە بجهـ بهێلن و ب مه‌ره‌ما ڤه‌دیتنا ژیانه‌كا ئارام ئو پاشه‌ڕۆژه‌كا باشتر رێیا كۆچبه‌ریا به‌ر ب ئورۆپا بگرن. فلم ژان و ئاواره‌یی ده‌ربه‌ده‌ری و هیڤیا مرۆڤی بۆ ده‌ستپێكرنا ژیانه‌كا نوو ل جهه‌كێ ئارام نیشان دده‌ن.
خویاكر: فیستیڤالا نێڤده‌وله‌تی یا فیلمێن ئه‌حمه‌د ئاباد ئێك ژ چالاكیێن سینه‌مایی یێن نویه ل باژێرێ ئه‌حمه‌د ئاباد ل هه‌رێما گوجرات ل وه‌لاتێ هندستانێ و ئارمانجا فیستیڤالێ پپشته‌ڤانیكرنا فلمسازێن سه‌ربه‌خۆ، ده‌رهێنه‌رێن نوو و هونه‌رمه‌ندێن جیهانێ یه، دا كو به‌رهه‌مێن خۆ ل پلاتفۆرمه‌كا نێڤده‌وله‌تی دا نیشان بده‌ن.
ته‌كه‌ز كر: فیستیڤال جۆرێن جیاوازێن فیلمێن وه‌ك كورته فیلم، فیلمێ درێژ، به‌ڵگه‌فیلم، فیلمێ ئه‌نیمه‌یشن و فیلمێ ئه‌زموونی وه‌ردگریت، هه‌روه‌سا به‌ریكانێ و خه‌لاتان ب باشترین به‌رهه‌مان دبه‌خشیت ئه‌ڤ فه‌ستیڤاله بزاڤێ دكه‌ت په‌یوه‌ندیا ناڤ به‌را فیلمسازێن ناڤخۆیی و نێڤده‌وله‌تی ب هێز بكه‌ت و جهه‌كێ بۆ گۆهڕینا ئه‌زموون و داهێنانان دابین بكه‌ت.
