ب چێكرنا ڤیدیۆیێن كۆمێدی من دڤێت خزمەتا خەلكی بكەم
مووسا خالد
سازان سەمیر، كچەكا خەلكا دهۆكێ یە، ماموستایا زمانێ ئنگلیزی یە، هندەك جاران ڤیدیۆیێن فێركاریێ ب رێكێن كۆمێدی د تۆرێن جڤاكی دا بەلاڤ دكەت، ئەو د دیدارەكێ دا بۆ رۆژنامەیا ئەڤرۆ دبێژیت: من ئەڤ كارە هەلبژارت چنكو من دڤیا كارەكێ جودا بكەم، چنكو دژیەكێ بچووك دا من حەزژ ڤیدیۆیێن كۆمێدی دكر و بڤێ ڕێكێ من دڤیا خزمەتا خەلكێ دهۆكێ بكەم.
هەروەسا گۆت: پشتی دەمەكی ژ كاركرنێ ئەو هزرە بۆ من هات ئەرێ بۆچی ئەز دو كاران پێكڤە گرێنادەم، كو پیشەیا منە و كۆمێدی ژی حەزو ئارەزوویا منە، لەورا من بڕیار دا دەستپێبكەم، چنكو ڕێكێن كلاسیكی پتر بۆ ژبەركرن و ڕێزمانا هشك دچیت و ل ڤێرە قوتابی نەشێت ب باشی وەربگریت، هەروەسا ترس و نە وێرەكی ل دەف پەیدا دبیت، بەلێ ب ڕێكا كۆمێدی باشتر دێ شێت وەرگریت، چنكو پەیڤ ل گەل دیمەنێن كۆمێدی دهێنە گرێدان، ئانكو دێ چاوا زمانی د ڕەوشێن راستەقینەیێن ڕۆژانە دا بكار ئینیت و ل ڤێرە دبیتە ئەگەر كو بەردەوام حەزا فێربوونێ ل دەف پەیدا ببیت، بۆ زانین من دڤیا ل سالا 2018 دەستپێبكەم بەلێ ژبەر وەغەركرنا بابێ من من پاشخست هەتا جارەكی دی زڤڕیم و نوكە خێزان هەموو د پشتەڤانن، هەروەسا بینەرێن مە د تۆرێن جڤاكی ژی دا هاندەرن كو یا بەردەوامبم و هزرێن جوان و جودا پێشكێشی وان بكەم و بۆ پاشەڕۆژێ ژی دێ مە هندەك پلان و هزرێن نوو هەبن.
