دهۆك ب هێز ڤەگەڕیا و زاخۆ نەشیا گرێیا سەركەفتنان ڤەكەت
قەیس وەیس:
ب دووماهی هاتنا یاریێن گەڕا نەهێ بۆ پشتەڤانێن دهۆكێ و نەورۆز دلخوەشكەر بوون پشتی سەركەفتنێن تیمێن وان و ڤەگەڕیان بۆ ناڤ هەڤڕكیێن خولێ دا و پێشڤەچوونەكا باش د ڕێزبەندیێ دا كرین، ئەوا د چارچووڤەیێ خولا ستێرێن ئیراقێ یا فوتبۆلێ هاتینە كرن.
گرنگترین سەركەفتن
تیما فوتبۆلا یانەیا دهۆكێ سەركەفتنەكا گرنگ و ژ هەژی ل سەر مێڤانا خوە یانەیا زەورا یا بەغدایی ب سێ گۆلێن پاقژ ب ئیمزایا هێرشبەرێ وێ ئاسۆ رۆستەم دو گۆل و یونس حەمود گۆلەك كو دهێتە هژمارتن ئێك ژ یاریێن دیرۆكی و گرنگ بۆ ئەلهۆیێن چیا، ئەڤێ سەركەفتنێ پێشكەفتنەكا باش د ڕێزبەندییا تیمێ دا پەیداكر ژ نەهـ خالان گەهاندنە 12 خالا و پێشڤە هاتە ڕێزا حەفتێ، ژ دو سەركەفتنان، شەش وەكهەڤییان و ئێك خوسارەتی، 14 گۆل تۆماركرینە و 11 گۆل ل سەر هاتینە تۆماركرن، یانەیا زەورا ب 18 خالان ڕێزا دویێ ما و دەلیڤەیا سەرێ لیستێ ژ دەستدا.
ڕاهێنەرێ دهۆكێ دلخوەشە
د پرێس كونفرانس دا یەحیا گول محەمە ڕاهێنەرێ تیمێ كەیفخوە شیا خوە دیاركر و گۆت: سپاس بۆ خودێ مە سەركەفتنەكا گرنگن و ژهەژی و دەمەكێ هەستیار دا بینن، دیسان سپاسیا یاریزانان دكە مكو ب مورالەكا بلند و سۆزەكا ڕژدی د ماوەیێ هەردو نیڤاندا باشتر شێوە یاری نیشان دایی، پێنەڤێت بەری دەستپێكرنا یاریێ دەما مە گیان و پشتەڤانێ بلند یێ جەماوەرێ مە من هەست پێ كر دێ سەركەفتنێ ئینن.
هەروەسان ناڤهاتی گۆت: مە ئاستەنگێن ب زەحمەت ل دەمێ بۆری دەرباز كرن، لێ گیانێ ب كۆم شیان د ڤێ یاریێ دا هێز و شیانێن دهۆكێ نیشان بدەین، تیما زەورا ئێك ژ هەڤڕكێن مەزنە د خولێ دا لێ ئەو پلانا مە دانایی تایبەت ب دەستپێكەكا هێرشرنێ كو پشتی بتنێ دو خولەكان مە گۆل ئینا بوو ئەگەر ئەم باشترین شێوە و كنترۆلا یاریێ بكەن، ئەم ژ هەژی پتر ژ سێ گۆلان بووین.
هەولێر د خولەكێن دووماهیێ دا وەكهەڤبوو
تیما یانەیا هەولێر دو خالێن گرنگ ژ دەستدان پشتی بەرانبەر خودانا ئەردی یانەیا نەفت ئەلمیسان ب گۆلەكێ وەكهەڤ بووی، هەرچەندە تیما هەولێرێ هەتا خولەكا 90+6 یا پێشكەفتی بوو ب گۆلەكێ لێ د خولەكا حەفتێ یا زێدەكرییا یاریێ دا گۆلا وەكهەڤیێ ل سەر هاتە تۆماركرن، بڤێ ئەنجامێ هەولێرێ خالێن خوە گەهاندنە 18 خالان ژ پێنج سەركەفتن، دو وەكهەڤی و خوسارەتیەكێ،
زاخۆ ل سەر ئەنجامێن لاواز بەردەوامە
تیما یانەیا زاخۆ نەشیا گرێیا سەركەفتنان ڤە كەت پشتی د یارییا چارێ یا خولا ستێرێن ئیراقێ دا تووشی خوسارەتیێ بوویی و نەڕازیبوونەكا بەرفرەهـ ژلایێ پشتەڤانێن وێ ڤە پەیدابوویە، پشتی د ڤێ گەڕێ دا ل یاریگەها خوە و دناڤ جەماوەرێ خوە دا ب گۆلەكێ تووشی خوسارەتییێ بووی، سەرباری یاریزانێن زاخۆ گەلەك بزاڤ كرن بۆ تۆماركرنا گۆلان لێ بێ ئەنجام بوون، بڤێ خوسارەتیێ تیما زاخۆ پاشڤە هاتە ڕێزا 12ێ ب كۆمكرنا نەهـ خالان ژ دو سەركەفتن، سێ وەكهەڤییان، یاریزانێن وێ حەفت گۆل تۆماركرینە لێ 12 گۆل ل سەر هاتینە تۆماركرن.
تەلال تووڕەیە
د پرێس كۆنفرانس دا یێ قەتەری تەلال ئەلبلۆشی ڕاهێنەرێ تیما یانەیا زاخۆ گۆت: ئەڤە تەپا پێی یە ئەو تیما ب چەنس بیت و مفایی ژ دەلیڤەیەكێ ژی بتنێ بینیت دێ گۆلێ ئینیت، یاریزانێن مە ئاستەكێ باش نیشان دا و ژ هەموو لایەكی ڤە هێرش دهاتنە كرن لێ ب گۆل ب دووماهی دهاتن، د بەرانبەر دا نەورۆزێ ئێك دەلیڤە ب مفا وەرگرت و گۆل ژی تۆماركر، دڤێت باشتر ل سەر تیما خوە ب ڕاوەستیین و ئاستێ وێ بەر ب باشتر بكەین، تایبەت ئەو شاشییێن هەین چارەسەر بكەین و ئەوان كێماسیان نە هێلین، ئەڤە نە ئەنجامێن مە نە و دڤێت ئێدی ڕاوەستیانا خالان بدووماهی بهێت.
نەورۆز پێشڤە هاتە ڕێزا دویێ
تیما یانەیا نەورۆز یا باژێرێ سلێمانیێ پێشڤە هاتە ڕێزا دویێ ل سەر لیستا خولا ستێرێن ئیراقێ ب كۆمكرنا 18 خالان ئەوا یانەیا ئەلگەرمە سەرێ لیستێ دهێت، نەورۆزێ پێنج سەركەفتن ئیناینە، سێ وەكهەڤی و ئێك خوسارەتی، یاریزانێن وێ 14 گۆل تۆماركرینە د بەرانبەر دا چار گۆل ل سەر هاتینە تۆماركرن.
