یاریزانەکێ پیرس دێ هەڤڕکییا چاردە وەلاتێن جیهانێ کەت
شاهۆ فەرید:
چاڤەڕێ دهێتە کرن ئەڤرۆ ل پایتەختێ قەتەرێ دەوحە کوڕێ باژێرێ دهۆکێ سیداد کۆڤان یاریزانێ یانەیا پیرس یاریزانێ ئێکانە یێ کوردستانی پشکداریێ د قارەمانییا قەتەر یا ڤەکری یا نێڤدەولەتی دا بکەت و چاڤ ل دەستکەڤتەکێ نێڤدەولەتییە.
لدۆر پێزانین و دووماهی بەرهەڤیێن وی د داخویانیەکا تایبەت دا محەمەد جبرائیل ڕاهێنەرێ تایکواندۆیا یانەیا پیرس گەشبینییا خوە دیارکر ب دیاربوونا ئاستەکێ باش و گۆت: ئەڤە قارەمانیە بناڤێ جەی وان یا ئاستێ جیهانی، هەمی یاریزان و ڕاهێنەر نەشێن پشکداریێ بکەن ژبەرهەبوونا ڕێنما و یاسایێن وێ یێن تایبەت، دڤێت هەردو هەلگرێن باوەرنامە یێن ئاست بلند بن، ئەڤ خالە ژی ژمن و یاریزانێ من گرتییە، ئەم دێ نوونەراتیا پارێزگەهێ و کوردستانێ و ئیراقێ کەین ژبەرکو ئێکانە پشکدارین، ئەڤە قارەمانیە ژلایێ فدراسیۆنا تایکواندۆیا وەلاتێ قەتەر ب هەڤکاری ل گەل فدراسیۆنا نێڤدەولەتی یا جیهانی دهێتە ڕێکخستن ب پشکداریا پێنجی و پێنچ وەلاتان هێتە ئەنجامدان.
ژلایەکێ دووڤە ناڤهاتی گۆت ژی: یاریزانێ مە سیداد کوڤان دێ ئاستی تازەپێگەهشتیان ل سەر کێشا شێست و پێنچ کیلوگرامی پشکدار بیت، لدوو سیتەمێ بۆ هاتیە دانان دێ هەڤرکیێ ل گەل چاردە وەلاتان کەت ئەوێن یاریزانێن وان ئاستێ تازەپێگەهشتیان پشکدار، ئەز یێ ب هیڤی مە دێ ئاست و ئەنجامەکێ باش دەستڤەئینین و مەدالیەکێ ڤەگەرینە دهۆکێ، سوپاس بۆ سەرۆکێ یانەیێ د. بەهزاد سالحی و کاپتن هەرژەنگ بابەکر زێباری بۆ هاریکاریا بەردەوام ل گەل مەدا.