یەحیا گولمحەمەد: ژ ئاستێ یاریزانێن خوە ڕازی نینم و داخوازا لێبۆرینێ ژ پشتەڤانان دكەین
قەیس وەیس :
ب دووماهی هاتنا یاریێن گەڕا 10ێ ژ خولا ستێرێن ئیراقێ یا فوتبۆلێ هەردو یانەیێن دهۆك و زاخۆ نەشیان دلێ جەماوەرێ خوە خۆشبكەن، پشتی ژ دەرڤەیی یاریگەهێن خوە ب خوسارەتی ل پایتەختێ ئیراقێ بەغدا و باژێرێ ئەنبارێ ڤەگەڕیاین و ڕاهێنەرێن وان ئەگەرێن ئەڤان خوسارەتییان دیاردكەن.
خوسارەتیا دویێ
تیما فوتبۆلا یانەیا دهۆكێ نەشیا ژ جولان دەربازبیت پشتی ب دو گۆلان بێ بەرانبەر تووشی خوسارەتیێ بووی، د یارییا واندا ئەوا ل یاریگەها رومادی هاتیە كرن، دەرئەنجامێ شاشیەكا گۆلپارێزێ دهۆكێ كەمیل سەعد ئەوێ بوویە ئەگەر پەنەلتیەك ل سەر تیما وی بهێتە هژمارتن گۆلا ئێكێ د خولەكا 16ێ دا هاتە تۆماركرن، پشتی ڤێ گۆلێ یاریزانێن دهۆكێ گڤاشتنەكا ئێكجار مەزن كر بۆ ڕاستڤەكرنا ئەنجامی لێ بێ گۆل ما هەتا خولەكا 89ێ یانەیا جەولان شیا گۆلا دویێ ژی تۆماربكەت، بڤی ئەنجامی دهۆك پاشڤەچوو ڕێزا نەهێ ب كۆمكرنا 12 خالان ژ دو سەركەفتن، شەش وەكهەڤی و دو خوسارەتیان، 14 گۆل هەنە و 13 گۆل ل سەر هاتینە تۆماركرن.
ڕاهێنەرێ دهۆكێ تووڕەیە
د پرێس كۆنفرانسێ ڕۆژنامەڤانی دا یەحیا گولمحەمەد ڕاهێنەرێ دهۆكێ گۆت: ل دەستپێكێ ئەم داخوازا لێبۆرینێ ژ پشتەڤانێن یانەیێ دكەین تایبەت ئەوێن هاتینە یاریگەهێ، سرۆشتی ئەم چووبووینە دناڤ یاریگەهێ دا و هزرا مە سەركەفتن بوو،ب شێوەیەكێ گشتی هیچ ڕەنگەكی ژ ئاستێ یاریزانێن خوە دڕازی نینم و داخوازا لێبیۆرینێ ژ پشتەڤانان دكەین، یاری بۆ مە بزەحمەت بوو، ژبەر شاشییەكێ و ژ دەستدانا فۆكسا یاریێ مە پەنەلتیەكا بێ ڕامان دا جەولان، هندەك یاریزان هوسا هزردكەن هەكە سەركەفتنەك ئینا ئەوان قارەمانی ژی بدەستڤە ئینا، دڤێت یارییا بهێت شاشیێن خوە چارەسەربكەین.
زنجیرەیا خوسارەتیێن زاخۆ بەردەوامە
تیما یانەیا زاخۆ بەردەوامە ل سەر ئەنجامێن خوە یێن لاواز پشتی د یارییا شەڤا دەربازبووی یا ڤێ گەڕێ دا تووشی خوسارەتیەكا دی بوویە بەرانبەر یانەیا نەفت یا بەغدایی ب دو گۆلێن پاقژ، د یارییا واندا ئەوا ل یاریگەها یانەیا نەفت ل پایتەختێ ئیراقێ بەغدا هاتیە كرن، یاری هەتا خولەكا 81 بێ گۆل بەردەوامبوو، لێ یاریزانێ نەفتێ یێ بەرازیلی كایكی د خولەكا 82ێ و 90ێ دا دو گۆل ل سەر زاخۆ تۆماركرن و خوسارەتییا پێنجێ گەهاندە كوڕێن خابووری، بڤێ ئەنجامی زاخۆ پاشڤە چوو ڕێزا 13ێ ب كۆمكرنا نەهـ خالان ژ ڤەرێژا خالێن دو سەركەفتنان و سێ وەكهەڤییان، دبەرانبەر دا پێنج خوسارەتی هەنە، بتنێ حەفت گۆل كرینە لێ 14 گۆل ل سەر هاتینە تۆماركرن.
تەلال یێ سەرسۆرمان بووی
د پرێسكونفرانس دا تەلال ئەلبلۆشی ڕاهێنەرێ تیما یانەیا زاخۆ یێ ڕازی نینە ژ ئاستێ هندەك یاریزانان و ئەنجامێ یاریێ و گۆت: هەرچەندە یارییەكا بزەحمەت بوو بەرانبەر تیمەكێ هەڤڕكییا ڕێزێن پێشیێ دكەت، لێ ئەو نە بوهانەیە ئەم خوسارەتییا تیما خوە پێ ڤەشێرین، داخوازا لێبۆرینێ ژ پشتەڤانان دكەین، ئەڤ خوسارەتییا دل ئێشە و جارا ئێكێ یە سێ خوسارەتییا لدووڤ ئێك دئینم، تیما مە پێدڤی ب پێداچوونەكێ یە و دڤێت سنۆرەك بۆ ژ دەستدانا خالان هەبیت، هندەك یاریزان د باش نەبوون، ئێدی دڤێت ل خوە بزڤرین و نابیت خالان ژ دەست بدەین.
یاریێن گەڕا 11ێ ب دێربی و دەلیڤەیا ڤەگەڕیانا خالانە
دهێتە چاڤەڕێ كرن ل پێنجشەمبییا بهێت دەست ب هەڤڕكیێن گەڕا 11ێ ژ خولێ بهێتە كرن و بڤی شێوەیی.
رۆژا پێنجشەمبی 22-10-2026
زاخۆ- هەولێر، یاریگەها زاخۆ، ل دەمژمێر 5:30 شەڤ.
تەلەبە- جەوییە، یاریگەها ئەلمەدینە، ل دەمژمێر 7:45 شەڤ.
ئەلغراف- نەفت، یاریگەها ناسریە، ل دەمژمێر 10ی شەڤ.
یاریێن رۆژا ئەینی 23-10-2026
دهۆك- كەربەلا، یاریگەها دهۆكێ، ل دەمژمێر 5:30 ئێڤاری
كەرخ- مووسل، یاریگەها شەرار حەیدەر، دەمژمێر 7:45 شەڤ.
زەورا- شورتە، یاریگەها زەورا، دەمژمێر 7:45 شەڤ.
ئەلجولان- كارەبا، یاریگەها ئەلجولان، دەمژمێر 10ی شەڤ.
یاریێن رۆژا شەمبی 24-101-2026
نەورۆز- دیالا، یاریگەها نەورۆز، دەمژمێر 5:30 ئێڤاری.
مینا- ئەلگەرمە، یاریگەها مینا، دەمژمیچر 7:45 شەڤ.
غازئەلشیمال- نەفت میسان، یاریگەها هەولێرێ، دەمژمێر 10ی شەڤ.