چار هەلبەستێن «ئان كارسۆن»ێ هەلگرا نۆبلا وێژەیی یا ئەڤ سالە
ئامادەكرن و وەرگێڕان ژ ئەرەبی:
عەدنان ئەحمەد مزووری
شاعر و نڤیسەرا کەنەدی «ئان کارسۆن» ێ خەلاتێ نۆبل یێ وێژەیی یێ ئەڤ سالە ٢٠٢٦ ب دەستڤەئینا، هەر وەک ئەکادیمیا سویدی ل ستۆکهۆلمێ ڕاگەهاندی، گۆت ژی کو کارسۆنێ خەلات ژبەر کارێن خۆ یێن «وێرەک و داهێنەرانە» وەرگرتییە. ب ڤێ هەلکەفتێ ئەڤە چوار هەلبەستێن وێ نە وەک نموونە ژ کارێن وێ یێن شعری:
1
ل دۆر ڕێڤەچوونێ بۆ پاش
دەیکا من ئەم ڕادگرتین ژ ڕێڤەچوونێ بۆ پاش.
وێ دگۆت مری هۆسا بڕێڤەدچن،
ئەڤ هزرە ژ کیرێ ئینابوو؟
بەلکو ژ وەرگێڕانەکا خراب.
ل دویماهیێ، مری بەرەف پاش ناچن،
بەلکو ئەو ل دویڤ مە ڕا دهێن.
وان سیهـ نینن و نەشێن گازی بکەن،
بەلێ ئەو حەزدکەن ئەم پشت خۆ بزڤڕین
ئەو قوربانی یێن ئەڤینیێ نە، گەلەک ژ وان.
2
ل دۆر بارانێ
ژ زەیتینێ تاریتر بوو، ل شەڤا ئەز چوویم.
و دەمێ من نێزیکی قەسران غارددا،
یا دلخۆش ب ئاوایەکێ سەیر، بارانێ دەستپێکر.
وەی بۆ وێ هزرێ،
ل دویماهیێ – ئەڤ شێوەیێن بچویک!
دێ بەرزە بم دەما وان دهەژمێرم.
کییە ئێکەمێ هزرا وان کری؟
چەوا پەسنا وان بۆ یێن دی کر؟
ل وێرێ ل سەر دەریایی ژی بارانە،
ل کەسەکی ناباریت.
3
سامانێ مە
د مالەکێ ڤە ل دەمێ زەردەپەری،
وانەیا دویماهیێ یا دەیکێ
بایەکێ رۆژئاڤایی دئازرینیت
هەمی رێکەفتنان ب داوی دئینیت
ب شەڤ د پەنجەران ڕا ب نێڕە،
دێ مرۆڤێن راوەستای بینی،
ئەم هەرگیز د وەسا بووین،
مە ئەگەرێن هەین کو مە دژۆرڤە بهێلن
تا کو ڕۆژ هاتی مە فێقی (و دار) بڕین،
و نۆکە ئەم یێ ل دەرڤە،
ئەو قەرێ مە بوو یێ مە دای.
4
ئەو هێز
ئەو هێز، دەیکا منە:
دئینمەدەر،
یا قوتای، گرێدای، تاری و تیک،
یا گرینۆک، پێشبر، یا هاڤێتی دناڤ ئاخینێن خۆ دا.
هێزەکا شکێنەر، دفنا مرنێ دهەڕشینیت،
دکێشیت و دادئێخیت. خوو پێکدئینیت و هێڕشێ دکەت.
وەکی کێرەکا نە خوینەلۆ، هەستییان تیژ دکەت،
ئەو هێز، دەیکا منە،
ب داوی هات،
تا کەنگی دێ هەست ب ڤێ کەلێ کەین؟