((ئۆباما و دۆمینه))
به‌ری چه‌ند ڕوژه‌كان سه‌رۆكێ ئه‌مریكا باراك ئوَباما د پڕۆگرامه‌كێ كوَمیدیێ ناڤدارێ تڕانه‌كه‌ردا ل تێله‌فزیۆنا (سه‌نتڕال) یا ئه‌مریكی پشكدار بوو, ناڤێ به‌رنامه‌ی (كۆلبرت راپوَرت)ـه و ژ لایێ پێشكه‌شكار و ڕاگه‌هاندكارێ ئه‌مریكیێ ناڤدار (ستیڤن كۆلبرت) ڤه دهێته پێشكێشكرن كو ئه‌و ژی نێزیكی (36) ساڵانه خه‌ریكی كارێ ڕاگه‌هاندكریه و به‌ر ب خانه‌نشینیێ دچیت, د ڤێ زنجیره‌یا به‌رنامێ خوه دا (ستیڤن كۆلبرت)ی كۆمه‌كا پرسیارێن ته‌نزئامێز و كه‌نیدار و تڕانه‌دار ژ ئوَبامای كرن و ب شێوه‌كێ ڕاسته‌وخوه به‌حسێ هنده‌ك ڕه‌فتار و ڕه‌وشت و عه‌ده‌تێن ڕوَژانه‌ێن وی ل ناڤ مال دا كرن وه‌كی هاڤێتن و ئێخستنێن گووره و جلكێن خوه ل سه‌ر ئه‌ردی و نه‌شووشتنا ده‌ستوچاڤان ده‌مێ ژ كارێ خوه دزڤڕیت, ئوَبامای ب به‌رسڤێن سه‌یر و كوَمیدی تر و جوَكینگڤه بێی هیچ شپرزه‌بوونه‌كێ پێشوازی ل ڤان به‌حسان دكر, د دووماهی پرسیار دا كو گۆتێ: ده‌مێ تو خاترا خوه ژ كوَچكا سپی دخوازی و كارێ ته‌یێ سه‌رۆكاتیێ تمام دبیت, ب هیڤی چ كاره‌كێ دن ئه‌نجام بده‌ی؟ ئوَبامای بیێ دو دلی گوَت: دخوازم دگه‌ل ته دوَمینێ بكه‌م چونكی تو ژی ڕاگه‌هاندكاره‌كێ دێرینی و به‌ر ب خانه‌نیشیێ دچی. مه‌ره‌م مه ئه‌وه كو ئه‌مریكا ئه‌ڤ وه‌ڵاتێ قودره‌تمه‌ند و زلهێزێ جیهانێ هنه‌ك پێگه‌ه و بنگه‌ه و پره‌نسیپێن ستراتیژێن سیاسیێن نه‌گوڕ و نه‌لڤ و خوه‌گر هه‌نه, زوَر یا زه‌حمه‌ته ده‌ستكاریێ تێدا بكه‌ن هه‌رچه‌ند سه‌رۆك و سه‌روَكاتی و حزبێن ده‌ستهه‌ڵاتدار ئالوگۆریا ده‌ستهه‌ڵاتێ بكه‌ن. نه‌خاسمه ژ ئالیێ پاراستنا به‌رژه‌وه‌ندیێن بالایێن گه‌لێن ئه‌مریكا و گه‌شه‌پێدانا ئابووریا خوه و ب هێزتركرنا لایه‌نێن هه‌ڤپه‌یمان ل گه‌ل وان و په‌ره‌پێدانا ستراتیژیه‌تا سه‌ربازی و پاراستنا پڕوَسه‌یا دیمۆكراسی د ناڤ ئه‌نجوومه‌نێن (كوَنگرێس و پیران) دا, ل دووڤ تێگه‌هشتنا مه, ئه‌ڤه‌نه هنده‌ك ژ وان نه‌گوَڕ و جێگیریێن كارێ ستراتیژی د دیروَكا ئه‌مریكا یا نوو دا. ڕه‌نگه بۆ مه كوردستانیان ژی هه‌بوونا هنده‌ك پره‌نسیپێن نه‌گوَڕ و نه‌لڤ و جێگیر، د پڕوَسه‌یا سیاسیدا كاره‌كێ گرنگ و ب له‌ز بیت نه‌خاسمه د ڤێ قووناغا دیرۆكیا هه‌ستیار, ڕه‌نگه ئه‌ڤ ده‌لیڤه سه‌دساڵێن دن دوباره نه‌بیت. یا خوه‌یایه و جهێ بایه‌خدانێ یه كو ئه‌ڤ حه‌فتیه د ڕوَژه‌ڤا سیاسیا مه كوردێن باشوور دا ب تایبه‌تی و پارچه‌ێن دن ژكوردستانێ ب گشتی, دێ گرنگی و به‌هایه‌ك تایبه‌ت هه‌بیت و ئه‌م هه‌می وه‌ك چاڤدێر و شڕۆڤه‌كار ب مه‌راق ڤه دنێرینه نووچه و هه‌وال و بزاڤان, ئه‌و ژی ژ ئه‌گه‌رێ سه‌ره‌دانا فه‌رمیا سه‌رۆكێ هه‌رێمێ مه‌سعوود بارزانی یه كو ئه‌ڤه بۆ چاره‌مین جاره ب شێوه‌كێ فه‌رمی و ل دووڤ داوه‌تنامه‌یا كۆچكا سپی وه‌كی سه‌رۆكێ هه‌رێما كوردستانێ سه‌ره‌دانا ئه‌مریكا دكه‌ت و ب فه‌رمی ژی وه‌ك سه‌رۆكه‌ك پێشوازی لێ دكه‌ن و كۆمبوون و میتینگێن ڤه‌كری و داخراو ژ لایێ سه‌رۆك و جێگر و بڕیاربده‌ستێن وێ ل گه‌ل گرێدده‌ن. د ڤێ سه‌ره‌دانێ دا كۆمه‌ك ئه‌جێندایێن هه‌مه‌ڕه‌نگ و هه‌مه‌جۆر ژ لایێ كه‌ساتیێن به‌رپرس و سازیێن ڕاگه‌هاندنان خستنه د ناڤ چه‌نته‌یا بارزانی دا, هه‌ر ل به‌حسكرنا شه‌ڕێ ئازادكرنا مووسلێ ڕا بگره هه‌تا دگه‌هیته ڕاگه‌هاندنا پاشه‌ڕوَژا هه‌رێما كوردستانێ و ئه‌و گوهۆرینێن كو گه‌له‌ك ب له‌ز ل ده‌ڤه‌رێ ڕوودده‌ن. لێ یا گرنگ و ڕاست ئه‌وه كو ئه‌م بزانین ئه‌مریكا ب نیازه د پلانا خوه یا ئه‌ڤان چه‌ند ساڵاندا, حه‌تا ساڵا 2020 ێ دخوازیت دووڤچوون و پێداچوونه‌كێ د ستڕاتیژیه‌تا خوه دا بكه‌ت نه‌خاسمه یا وه‌زاره‌تا به‌ره‌ڤانیێ, دخوازیت سیسته‌مێ به‌ڕڤانیێ و خه‌رجیێن وێ ده‌ستكاری بكه‌ت و سیاسه‌ته‌كا نوو و تازه په‌یڕه‌و پیاده بكه‌ت, زوَر ژ مێژه به‌رێ ئه‌مریكا كه‌تیه عه‌سمانان لێ هێشتا ئه‌م ل ئه‌ردی دنێرین. له‌وما گه‌لوَ ئه‌ز دخوازم (ئوَباما) زووتر ده‌ست ب دوَمینه‌یا خوه بكه‌ت.
