زێرەڤانی ھەمبەری مەترسیا زاخۆ و دھۆک د دەلیڤەیا دووماھی دا
ئەڤرۆ:
چاڤەرێ دھێتەکرن ئەڤرۆ چاڤێ زوربەیا چاڤدێرێن وەرزشی یێن کوردستانێ ل پارێزگەھا دھۆکێ بیت و ئەنجامێن یاریا ھەردو یانێن دھۆک و زێرەڤانی بۆ خوە نێزیکرن بۆ ناسناڤێ خولێ بەری ب دووماھی ھاتنا خولێ ب حەفتیەکێ کو زێرەڤانی دێ مێڤانداریا زاخۆ کەت د یاریەکا زحمەت دا و دھۆک ل گەل برایەتی کەت ل یاریگەھا خوە.
ل یاریگەھا خوە تیما زێرەڤانی دێ مێڤانداریا یانەیا زاخۆ کەت د یاریەکێ دا کو چاڤێ ھەموو پشتەڤانێن یانا دھۆکێ دێ ل ئەنجامەکێ باش یێ تیما زاخۆ بیت کو ب ھەر ئەنجامەکێ وەکھەڤی یان سەرکەفتنا زاخۆ و د ھەمان دەم دا دھۆک سەرکەفتنێ توماربکەت دێ بیتە باشترین دیاری تیما زاخۆ پێشکێشی پشتەڤان و یانا دھوک، لێ تیما زاخۆ ژی باش د زانیت ئەرکێ وێ دگەل سەرکێشا خولێ و خودانا دو ناسناڤێن بوری یێ ب سانەھی نابیت و د ڤێ یاریێ ھەردو تیمان کێماسی د پێکھاتیێ تیمێ دا ھەنە، ب تایبەت تیما زێرەڤانی ئەوا دێ بێ پشکداریا سێ باشترین یاریکەرێن خوە یاریێ کەت، ئەوژی بیلال سالح، نێچرڤان شوکری و گولچیێ تیمێ زوھێر عەبدولجەمال ژبەر کارتێن سور و زەر یێن یاریێن بوری.
ل یاریگەھا دھۆک یا ئێکێ تیما دھۆکێ دێ مێڤانداریا تیما برایەتی کەت کو ئەرکێ دھۆکێ ژی یێ ب سانەھی نابیت بەرامبەر تیمەکێ ئەوا د وەرزێ خوە یێ ئێکێ دا مانا خوە د خولێ دا مسوگەرکری و ل دو یاریێن بوری شیای سەرکەفتنێ توماربکەت و بۆ ڤێ یاریێ چو کێماسی د پێکھاتیێ تیما دھۆکێ دا نینە بتنێ ئاریشا وێ یا مەزن ئەوە دێ پشتی سێ رۆژێن دی یاریەکا ب زحمەت ھەمبەری یانەیا مینا کەت دخولا عیراقێ دا و دبیت دڤێ یاریێ دا ھژمارەکا یاریکەرێن سەرەکی یاریێ نەکەن تیما نەوروز ئەوا ھیڤێن وی ژ ھەردو تیمێن دھۆک و زێرەڤانی کێمتر دێ بیتە مێڤانا یانەیا ئارارات ل پیرمام .
ژلایەکێ دووڤە ھەڤرکی ھەتا نوکە بۆ داکەفتنێ بو خولا پلا ئێک یا بەردەوامە دناڤبەرا سێ تیمان دا ئەوژی ھەولێر و سلێمانی و پێشمەرگا سلێمانی و د یاریەکا مان و نەمانێ دا تیما پێشمەرگا سلێمانیێ دێ بیتە مێڤانا پێشمەرگا ھەولێرێ کو ژبلی سەرکەفتنێ چو ئەنجامێن دی د بەرژوەندا زێ دا نینن، بەرامبەر تیما پێشمەرگا ھەولێرێ دێ بزاڤێ بۆ سەرکەفتنێ کەت و بەردەوامی ب دەتە ھەڤرکیا رێزا چارێ و سێ د لیستەیا خولێ دا، ل یاریگەھا کەلار ھەردو تیمێن شێروانە و سلێمانی دێ ھەمبەری ئێک بەن و دڤێ یاریێ دا تیما سلێمانی پێدڤی ب سێ خالان ھەیە دا مانا خوە مسوگەر بکەت و ھندرین دێ یاریگەھا خوە بەرامبەر کەرکوک کەت.
