ئەڤرۆ دێ دھۆک و مینا ياريێ كه‌ن
ئەڤرۆ:
پشتی د یاریا ڤەکرنا قوناغا بژارە یا خولا عیراقێ دا تیما تەپا پێێ یا جەویە شیای سەرکەفتنەکا گرنگ ل سەر یانا نەفت ئەلجنوب توماربکەت، بریارە ئەڤرۆ بەردەوامیێ ب یاریێن ڤێ قوناعێ بھێتە دان ب کرنا سێ یاریان، ل دەمژمێر ٤:٣٠ ئێڤاری ل یاریگەھا خوە تیما دھۆک دێ بەرامبەر تیما مینا یا بەسرا یاریێ کەت و د ڤێ یاریێ دا خودانا ئەرد و جەماوەری ئەرکێ وێ دێ یێ ب زحمەت بیت ژبەرکو بەری چار رۆژان یاریەکا ب زحمەت ژ خولا کوردستانێ کریە و چاڤەرێ دھێتەکرن پشتی سێ رۆژێن دی ژی یاریەکا دی بکەت، بەروڤاژی تیما مینا ئەوا نوکە د رەوشەکا ئارام دا بوریت و ژ کەمپا خوە یا راھێنانی ل وەلاتێ لوبنان ڤەگەریای و دێ بزاڤێ کەت سەرکەفتنا خوە ل سەر یانا دھۆک دووبارە بکەت، پشتی ل یاریێن قوناغا کوما ب سێ گولان بەرامبەر گولەکێ سەرکەفتی .
ل دۆر دووماھی بەرھەڤیێن یانا دھۆک راھێنەر حازم سالح بۆ رۆژناما ئەڤرۆ گوت: چو کێماسی د پێکھاتیێ تیمێ دا نین، بتنێ ئاریشا مە تیم یا ڤەگەریای ژ ماندی بوونەکا مەزن و ھەکە ژلایێ یاریکەران ڤە مە باوەریەکا مەزن ب شیانێن وان ھەیە و ئاستێ وان ژ چو یاریکەرێن دی کێمتر نینە.
ھەردیسان ناڤبری گوت: ئارمانجا مە یا سەرەکی ئەوە دڤێ قوناغێ دا چو خالان ل یاریگەھا خوە ژ دەست نەدەین و
سەرکەفتنا ئەڤرۆ دێ بیتە دەرگەھێ ھەڤرکیا ئێک ژ پلێتێن دەربازبوونێ.
ژلایێ خوڤە راھێنەرێ تیما مینا یێ سوری حوسام سەید گوت: کرنا یاریێ بەرامبەر دھۆکێ ل یاریگەھا وێ یا ب سانەھی نینە ژبەرکو چو گڤاشتن ل سەر تیما دھۆکێ نین بۆ دەربازبوونێ، لەورا دێ ب ئارامی یاریێ کەت، بەروڤاژی تیما مە ھەر ئەنجامەکێ نە چاڤەرێکری دێ رێکا دەربازبوونێ بۆ مە ب زحمەت کەڤیت .
ژلایەکێ دووڤە ژ یاریێن کوما ئێکێ تیما بەغداد دێ مێڤانداریا یانا نەفت وەست کەت ل یاریگەھا شەعب ل دەمژمێر ٤:٣٠ و ھەر ئێکسەر پشتی وێ یاریێ بریارە یاریا کلاسیکو یا بەغدا دناڤبەرا شورتە و زەورا بھێتەکرن.