بارزانى ل گه‌ل سه‌رۆكێ مسرێ و فه‌لستينێ كۆمبوو
ئه‌ڤرۆ نيوز:
ئه‌ڤرۆ رۆژا ئه‌ينى رێكه‌فتى 22ى گۆلانا 2015ێ مه‌سعود بارزانی پشكدارى کۆربەندا ئابووریا جیھانییا ل دەریایا مریا وەلاتێ ئوردنێ کر.
د چارچوڤێ ڤێ کۆربەندا جیھانی دا سەرۆک بارزانی ل گەل عه‌بدولقادر سیسی سەرۆک کۆمارێ مسرێ و شاندێ د گەل دا كر. د ڤێ کۆمبوونێ دا بەحسا رەوشا سیاسی و ئەمنیا ده‌ڤه‌رێ و ھەرووسا گه‌فێن تيرۆرستان و مه‌يدانێن شه‌رى و سه‌ركه‌فتنێن هێزێن پێشمه‌رگه‌يى ل به‌رامبه‌ر تيرۆرستان خسته به‌رچاڤ. ھەر د ڤێ کۆمبوونێ دا سەرۆکێ مسر دەستخوەشی ل سەرۆک بارزانی و گەلێ کوردستانێ و ھێزێن پێشمەرگەى کر و ل دژی تيرۆریستان ھيڤیا سەرکەفتنێ ژ بۆ ھێزێن پێشمەرگە خواست.
د ڤێ ھەڤدیتنێ دا تەکەز ل سەر پێشخستنا پەیوەندیێن دۆستانەیا د ناڤبەرا گەلێ مسر و گەلێ کوردستانێ دا هاته‌کرن.
ھەر د چارچوڤێ ڤى کۆربەندى دا رۆژا ئه‌ینێ سەرۆک بارزانی ل گەل مەحمود عەباس سەرۆکێ فه‌لستینێ و شاندێ د گەل دا كۆمبوو.
د ڤێ کۆمبوونێ دا سەرۆک عەباس رۆناھی خستە ل سەر ھەول و سەرکەفتنێن ناڤدەولەتی و دیپلۆماسیێن فه‌لستینێ ل ئاستێ جیھانێ ژ بۆ بەرەڤ پێشڤە برنا دۆزا گەلێ فه‌لستینێ و بەحسا رەوشا سیاسیا ناڤخوەیا فه‌لستینێ کر.
د ڤێ ھەڤدیتنێ دا سەرۆک بارزانی بەحسا پێشھاتێن سیاسی و ئەمنیێن دووماهيێ يێن عيراقێ و شەرێ دژی تيرۆریستێن داعش و ھەروه‌سا سەرکەفتنێن ھێزێن پێشمەرگەیێن کوردستانێ کر.
د ڤێ کۆمبوونێ دا ھەر دو لايان ته‌كست ل سەر بەردەوامبوون و کوورکرنا پەیوەندیێن د ناڤبەرا ھەرێما کوردستان و فه‌لستینێ دا کرن.
ھەر د ھەمان رۆژێ و ل کۆربەندا ئابووریا جیھانی ل ئوردن سەرۆک بارزانی و سەلیم جبووری سەرۆکێ جڤاتا نوونەرێن عيراقێ جڤیان.
د ڤێ ھەڤدیتنێ دا سەرۆکێ جڤاتا نوونەرێن عيراقێ بەحسا ئه‌جنيدايا وێ سەردانێ کر کو ب نیازە ل پاشارۆژەکا نێزیک سه‌ره‌دانا ئه‌مریکا ئەنجام بدەت. د پشكه‌كا دى يا ڤێ ھەڤدیتنێ دا رەوشا سیاسی و ئەمنیا عيراقێ ب گشتی و رەوشا ئەنبار و ھەرەشەیا تيرۆرستێن داعش ھاتە نرخاندن.
ل درێژاھیا ھەڤدیتن و کۆمبوونێن ل چارچوڤێ کۆربەندا ئابووریا جیھانی دا سەرۆک بارزانی و بەھا ئەعرەجی جێگرێ سەرۆک وەزیرێ عيراقێ کۆمبوون. د ڤێ کۆمبوونێ دا جێگرێ سەرۆک وەزیرێ عيراقێ بەحسا رەوشا سیاسیا عيراقێ و پەیوەندیێن ھەرێما کوردستانێ و ناڤەندێ کرن و تەکەز ل وێ یەکێ کرن کو پێویستە پەیوەندیا د ناڤبەرا ھەولێر و بەغدا دا تووشی گرفتان نەبن و ئەو پەیوەندی بەرەڤ پێشڤە بچن و ئەڤە ژی خستەروو کو ل بەغدا گەلەک کەس و ئالی ھەولا ئەوێ چه‌ندێ دده‌ن کو ئەو پەیوەندی پاراستی بێ و زیانێ بەر نەکەڤێ. ل بەرانبەر دا سەرۆک بارزانی سۆپاسیا ھەلويستێ جێگرێ سەرۆک وەزیرێ عيراقێ کر و ھيڤیا سەرکەفتنێ ژ بۆ وی خواست.