ھوزان ئازاد: راھێنەرێ زێره‌ڤانى و ھاریکارێ وى بزاڤا کرینا ئەنجامێن یاریان دکر
ئەڤرۆ نيوز:
یاریکەرێ ھێلا ناڤینا تیما تەپا پێی یا زێرەڤانی دیارکر کو دو رۆژان بەری یاریا وان د گەل تیما تەپا پێی یا سلێمانیێ کادرێ راھێنانێ و ل گەل سەرپەرشتێ تیمێ کار لسەر کرینا وێ یاریێ دکر و چەندین بزاڤ ل گەل من کرن کو واستەکاریێ بو وان بکەم ل گەل یاریکەرێن تیما ھەڤرک لێ رازینەبووم.
زێدەتر د دیدارەکا تایبەت دا ھوزان ئازاد بۆ رۆژناما ئەڤرۆ گوت: ل باژێرێ سلێمانیێ بەری رۆژا یاریێ راھێنەرێ یانا زێرەڤانی سلێمان رەمەزان و ل گەل دا ھاریکارێ وی غەزوان محەمەد حاجی ئەز گازیکرمە ژورا خوە و داخواز ژمن کر ل گەل گولچیێ سلێمانیێ یاسین باخڤم و رازیبکەم یاریێ بدەتە مە بەرامبەر کوژمێ دو ملیون دینارا و پشتی ئەز لسەر ڤێ چەندێ رازینەبوویم کو ڤی کاری بکەم چنکو دێ لسەر من ھێتە ھژمارتن و سەرەرای وێ چەندێ کو گەلەک گڤاشتن لمن کرن ڤی کاری بکەم و دووماھیێ ب تورەی ڤە ئەز ژ ژورێ دەرخستم.
زێدەتر ناڤبری ئەو چەندە ژی دیارکر کو سەرپەرشتێ تیمێ رێبەر نوعمان گوتبویێ ھەر دەمێ رازیبوو ئێکسەر وەرە پارا ببە و ھەر چ کوژمێ بڤێت د حازرین بدەینێ بەرامبەر وێ چەندێ گولچی یاریێ بدەتە مە و ب سەرکەڤین.
ھوزانی ئەو چەندە ژی گوت: من پێزانین ھەنە بزاڤ ل گەل گەلەک یاریکەرێن سلێمانیێ ھاتبوکرن کو یاریێ بدەنە مە لێ یاریکەرێن سلێمانیێ رازی نەبوون.
لدووماھیێ ھوزانی دیارکر کو بزاڤ ب رێکا یاریکەرێن مە یێن پیشەکارێن سلڤادوری دھاتنەکرن کو یاریکەرێ زاخۆ یێ سلڤادوری رامون بھێتە رازیکرن ب دروستکرنا پەنەلتیەکێ بەرامبەر کوژمەکێ پارەی و دیارکر کو زوربەیا ڤان کارا ب رێکا ھاریکارێ راھێنەری دھاتنەکرن و راھێنەری ئەو کارە پێ دکرن.