پۆست داعش
تۆندڕهو و تۆندڕهوی خوه د ناڤ گههێن ههر ئایدلۆجی، ئۆلهكی و جڤاكهكێ دا ڤهشارتیه و د پێڤاژۆیا شارستانیا مرۆڤاتیێ دا ههڤ روشی بهرۆكا مرۆڤاتیێ بویه و لاپهرێن دیرۆكێ ژ كریارێن وان ئێن هۆڤانه دمشتن؛ ئهڤجا داعش نه گرۆپهكا ئێكانه و نهسازه د دیرۆكا ئولێ ئیسلامێ دا(وهكو هندهك دبێژن) دهركهڤتیه و دێ نهیا داویێ بت. گهلهك كهس ب تایبهت تهیارێ ئیسلاما سیاسی وێ بزاڤێ دكهن كو داعشێ ب گرۆپهكا یاخی ژ هزرا ئیسلامێ و تۆمهتا دامهزراندنا وێ پاڵددن هێزێن دژ ئیسلامێ بۆ بێهێزكرنا ئیسلامێ و بهركناركرن و دووركرنا وێ ژ سهردهپێ شانۆیا رودانان و نههێلانا باندۆرا وێ ل سهر ژیارا جڤاكی. لێ یا راست داعش بهرههمێ هزرا ئیسلاما تۆندڕهوه ئهوا ههر ژ دهستپێكێ ههڤ تهریبی باسكێ میانڕهو كهڤتیه وهرارێ، زانا و نهخشهسازێن ڤی باسكی ددیارن و ههوجهی چ پاساوا نینن و ههردوو باسكێن ئیسلامێ(سوننه و شیعه) چ د دهمێن دهستههڵاتێ دا بن یان دووری دهستههڵاتێ بن تۆندڕهوی و تیرۆر وهك دوو تێگههێن بێ دهنگكرنا یێ دن بكار ئینایه، ئهڤجا چ ل دژی ههڤ دابن خهبتاندن(بهردهوامیا شهرێ سوننا و شیعا) چ ل دژی یێ دن وهك غهزو، ئهنفال و ژ ناڤبرنا ههموو شونوار و شارستانیا دهڤهرێن كهڤتین بن داگیركهریا وان ب هێجهتا پرخودایی (وهسهنی) بوونا وان مللهت و شارستانیان، نموونا ههری نێزیك: تێكدانا پهیكهرێ بودای ل ئهفغانستانێ ب دهستێ تالیبان و پهقاندنا گۆڕێ پێغهمبهر یونسی و شیتی(سڵاڤ لسهر بن) و شونهوارێن ئاشوریان ل موسال ب دهستێ داعشێ و ئهڤرۆ شوانوارێن تهدمۆر ل سوریا دبن گهفا نهمانێ دانه. داعش باسكهكێ گرنگێ ئیسلامێ یه و خودان پێگهههكێ هزریێ بهێزه و دگهل باسكێ میانڕهو د پرانیا خالێن بنگههین دا ههڤ دگرن و بهلكو ههڤدوو تمام دكهن، ژبهرهندێ باسكێ میانڕهو ئهڤرۆ د نابهینا سندان و چهكۆچێ پێدڤیێن سهردهمی و پاراستنا هیمێن ئیسڵامێ وهك ئۆل دا و كریارێن داعشێ یێن هۆڤانه، سهرگهردان مایه و نكارت ههلوێستهكێ ئێكبڕ د گونههباركرنا داعشێ دا بدهت. كریارێن داعش ئهڤرۆ ئهنجام ددهت و ژ كوراتیا كولتۆرێ ئیسلامێ هاتیه و بهردهوام ئهڤ هیمه د مزگهفت و دهزگههێن راگههندنا ئیسلاما سیاسی دا تێنه بانگهێشكرن و بێی كو دهستههڵاتێ ئهو وێرهكی ههبت سنوورهكی بۆ بدانت؛ چونكو داعش ب پیڤهرێن ئیسلامی ل سهر هێلا گشتیا وێ لانهدایه و ههر ژبهرهندێ یه تهڤایا رادیكالێن ئیسلامی ل سهرانسهری جیهانێ پشتهڤانیێ لێ دكهن و بوونه عمبارا پێشكهشكرنا هاریكاری و پشتهڤانی كرنێ ب مخابنی ڤه ل كوردستانێ ژی پشتهڤانێن خوه ههنه چونكو ئاڤاكرنا دهولهتا خیلافا ئیسلامی ئامانجا دوماهیكا تهڤ بزاڤا ئیسلاما سیاسیه. د دیرۆكا نێزیك دا ئهڤه بۆ جارا چارهمینه ئیسلاما سیاسی دهێته سهرتهختێ دهستههڵاتێ بۆ جارا ئێكێ ل ئیرانێ و سودان و ئهفعانستان و خیلافهتا داعشێ، چارهنڤیسا سودان و ئهفغانستانێ هلوهشیان و یا ئیرانێ لبهر سهكهراتێ یه و ل سهر داعشێ شهرهكێ جیهانی دهێته مهشاندن. ژ هلوهشیانا سودان و ئهفغانستانێ تیرۆرا قاعیده و تالیبان دروست بوو و یا كۆمارا ئیسلامی ژی حزب الله و گرۆپێن توَندڕهوێن شیعه پهیدا بوونه و سهرێ دهڤهرێ گێژ كریه. ڤهخاندنا دیرۆكا ئیسلاما سیاسی وێ دئینته شكهڤێ كو ژ ئهنجامێن شكهستنا وان و خوه لبهر پرس و گرفتێن دهمی نهگرتنێ لایهنهكێ دن ئێ تۆندڕهوتر پهیدا دبت. داعش و نهخشێ وێ ل بهر بایه و رۆئاڤابوونا وێ نێزیكه لێ ترسا پهیدا بوونا پۆست داعشهكا تۆندڕهوتر برێڤهیه. فهره رایهدهراێن مه ههر نها دهست ب نهخشهدانانێ بكن بۆ روو ب روو بوونا پۆست داعشێ ئگهر نه ْ مینا جارا دێ بێژین:( رهحمهت ل گۆڕا كفن دزی).