ل ڕۆژا ئێكی شه‌ش..
ته‌قته‌قا تبلكا ته یا پێ ل مافێ زه‌وقێ من دده‌ت! لێدانا ده‌ستێن ته یا په‌نجه‌را ترۆمبێلا من پیس دكه‌ت! ره‌وشا جاده و شه‌قامێن باژێرێ ته یا جوانیێ تێك دده‌ت! ته نه تنێ پێل ل مافێ من دانا، یاسا ژی ته سه‌رپێچ دكه‌ت!.. د زگماكا خوه‌دا ته ماف هه‌بوون زارۆ و مه‌لاڤانی بوون و كه‌یڤ كه‌یفا ته‌بوو تویێ ئازاد بووی و چ خه‌م خه‌یال نه‌بوو فرشكێ ژیانێ یاری و وه‌رزشا ته بوو.. بق بقا په‌قیژكێن ئاڤێ ئاوازێن ته بوو خوداوه‌ندێ خودانێ مافان هه‌می ماف دابوو هه‌بوونا ته ل سه‌ر ڤێ جادێ شه‌رمزاری بوو ده‌نگێ ماف و درووشمێن نیڤنه‌ته‌وه‌ی بوو سۆزێن هه‌لبژارتنێن دره‌و سالا بووری بوو.
ئێكی شه‌ش! رۆژا پاراستنا مافێن زارۆیان، مه‌ترسیێن شه‌ر و پێكدادانا پێدڤی ب چاڤدانه‌كا تایبه‌ته ل سه‌ر زارۆیێ كورد بهێته كرن، ئه‌ڤ چاڤدانه به‌ری هه‌میان ژ خێزانێ ده‌ستپێدكه‌ت كو دایك و بابن و خووشك و برایێن مه‌زنن، به‌ری ئه‌م تبلێن خوه بكه‌ینه دچاڤێن حوكمه‌تێ دا و گونه‌هێ بكه‌ینه ستویی، ئه‌م دڤێت ژ خوه ده‌سپێ بكه‌ین كا ئه‌م ڕه‌فتارێن خوه گه‌ل زارۆی دورست بكه‌ین، جوان و مه‌زن گه‌ل وان باخڤین ڕێزگرتنا هزرێن وان بكه‌ین، قوتان به‌سه! گرێدان و زوری به‌سه! ئه‌ڤه هه‌می دهێته سه‌رێ زارۆی هێشتا زارۆ نه‌هاتیه به‌ر ده‌ستێ حوكمه‌تێ!. مافێن زارۆی بنپێ دبن ده‌مێ بێی ڕه‌زامه‌ندیا وی دهێته (سونه‌ت) كرن ل گه‌له‌ك جهێن كوردستانێ كچان ژی (سونه‌ت) دكه‌ن ئه‌ڤه ژی ئه‌نجامێن وێران ل پاشه‌رۆژی گه‌ل خوه ڕادكه‌ت، هه‌روه‌سا زارۆ دهێته گرێدان د لاندك و دیدیكان دا كو نكارین ده‌ست و پێت خوه بلڤینیت! ئه‌ڤ چه‌نده وه دكه‌ت كو ماسولكێت زارۆی ئاڤا نه‌بن. مافێ زارۆینیه خوارنه‌كا خوه‌ش و پاقژ بخۆن، هه‌وه‌سا ئاڤه‌كا پاقژ ڤه‌خۆن، مافێ وان باخجه و قوتابخانێن پاقژ و پێشكه‌فتی هه‌بن، مافێ وانه كو وانا وه‌رزشی نه كه‌نه وانا زمانی، مافێ وانه رێزگرتن ل وان بهێته گرتن ل شوونا كرێتی و شكاندنا كه‌سایه‌تیا وان، مافێ وانه ل قوتابخانێ شیری و فێقی بخۆن و ڤه‌خوون و ستران و له‌یزینێ بكه‌ن. زارۆ ل كوردستانێ ئاڤا نابیت نه ب مێشكی و نه ب له‌شی! ئه‌نجام ژی یێ ل به‌ر چاڤێن مه ئه‌ڤرۆ قوتابیێ قووناغا په‌یمانگه‌هێ نكاریت پێنج ڕێزێن نڤیسانێ ل سه‌ر په‌ڕی پڕبكه‌ت ب زمانێ ده‌یكا خوه كو كوردی یه، هه‌روه‌سا زارۆی 1000 كێماسیێن دی د گه‌ل خوه دا هه‌نه ل ڤی وه‌لاتی، مه دڤێت ئه‌ڤه بۆ مه ببنه چ؟ بوونه دكتور و ئه‌مێ مه‌قه‌سا ده‌ستگورگا د (تیژكێرا) دبینین، بوونه ئه‌ندازیار و چاڤێ خودێ ل ده‌ورا هه‌سپان بیت، بوونه بازرگان و خودێ هه‌قێ مه ژ ڤان زارۆیان بستینیت، بوونه شۆفێرێن ته‌كسیا بێ هیرده، بوونه مامۆستا و ناهێته گۆتن، بوونه به‌رپرس و ئه‌ز نه‌وێرم بێژم، ئه‌ڤ زارۆیه بوونه هه‌می تشت د وه‌لاتی دا لێ د ڤالانه و ب كێماسینه د هه‌ر تشتی دا. ل ڤی زه‌مانێ ئه‌م تێدا دژین و ل كوردستانێ زارۆ كار دكه‌ت ل خوارنگه‌هان و ل سه‌ر جادان و ل به‌ر دیواران پاره‌ی بۆ خێزانێ دهینیت دا مافی بده‌ته ده‌یبابێن خوه كو بژین، زارۆ یێ مافێ ژیانێ دده‌ت و خوه دكه‌ته قوربان. یا چڕیای و دڕیِای و كون ژ پاته‌ی مه‌زنتره، رۆژانه دلێ مه یێ دئێشیت بۆ وان زارۆیێن ل به‌ر په‌نجه‌رێن ترومبێلێن مه، تو بۆچی هاتیه سه‌ر ڤێ دونیایێ بێ ماف؟ ما تو نزانی (شه‌ڕێ سه‌یانه) سه‌را مافان ل ڤی باژێری؟ ما تو نزانێ ئه‌م هه‌می یێن ل مافێن خوه دگه‌ریێن ؟ ئه‌ز ژی وه‌كی ته یێ ل پشت په‌نجه‌را سه‌یدایه‌كی و ئه‌و سه‌یدا ژی یێ ل پشت په‌نجه‌را سه‌یدایه‌كێ دیتر!.. ئه‌م نزانین نوكه مافێن خوه مه‌زنان وه‌رگرین پاشی یێن زارۆیان؟. ژبلی چێكریێ خودێ كو دبێژنێ به‌هره، ئه‌مین زارۆیان چێدكه‌ین ب ڕه‌وشت و زانین و په‌روه‌رده دكه‌ین، ئه‌مین ده‌ستهه‌لات كو مافی بده‌ینێ یان بێ به‌هر بكه‌ین ژ مافان، حوكمه‌ته ده‌یك و بابێن ته‌یێن مه‌زن.
