كۆبانێ نێزيكى 70 كه‌سان شه‌هيد و بريندار دبن
ئه‌ڤرۆ نيوز:
يه‌كينێن پاراستنا گه‌ل “يه‌په‌گه” د راگه‌هاندنه‌كێ دا راگه‌هاند: چه‌كدارێن داعش ل سنورێن توركيا هێرش بۆ سه‌ر كۆبانێ ئه‌نجام دايه.
يه‌كينێن پاراستنا گه‌ل د راگه‌هاندننامه‌ك ئه‌ڤرۆ رۆژا پێنجشه‌مبى رێكه‌فتى 25ى خزيرانا 2015ێ ل دۆر كاودانێن كۆبانێ به‌لاڤكر و تێدا داخواز ژ وه‌لاتيان كر كو ب تنێ ل مالێن خوه بمينن و خوه ب پارێزن هه‌تا شه‌رڤان كارێ خوه ئه‌نجام دده‌ن.
يه‌په‌كێ راگه‌هاندى يه ژى كو ئه‌و هێرشا چه‌كدارێن داعش بۆ سه‌ر كۆبانێ ژ توركيا ڤه ده‌ستپێكريه، له‌شكرێ توركيا ژى بۆ ئه‌نجامدانا وى كارى هاريكاريا داعش كريه.
د هه‌مان ده‌م دا فه‌تحولا حوسێنى ئه‌ندامێ نوونه‌راتيا كانتۆنێن رۆژئاڤايێ كوردستانێ د داخۆيانيه‌كا رۆژنامه‌ڤانى دا راگه‌هاند كو نوكه شه‌ر و پێكدادان يا به‌رده‌وامه، به‌لێ شه‌رڤانێن يه‌په‌گێ ده‌ست ب ئۆپه‌راسيۆنێ كريه و ئه‌و چه‌كدارێن داعش ژى يێن هێرش كريه سه‌ر كۆبانێ، ره‌نگه نه‌شێن ده‌رباز بن، چونكو ب تنێ رێيا سنۆرى يا توركيا يا بۆ ڤه‌كريه و هه‌رسێ رێيێن دى د گرتى نه.
ئه‌ڤرۆ سپێدێ ده‌مژمێر 5:00 ب جلكێن وه‌كو يێن يه‌په‌گێ و ژ لايێ سنورێ توركيا ڤه چه‌كدارێن داعش هێرش كريه سه‌ر كۆبانێ و ل ده‌سپێكێ ل خالا سنورى پايسكله‌ك په‌قانديه و پاشان ژى ترۆمبێله‌ك ل ناڤ باژێرى په‌قانديه و چووينه ناڤ هنده‌ك جهێن گرنگێن كۆبانێ وه‌كو نه‌خۆشخانا مشته‌نۆرێ و قه‌ناس ب ده‌ستێن وان ژى چووينه سه‌ر بانێ هنده‌ك خانيان و شه‌ر د ناڤبه‌را وان و هێزێن يه‌په‌گێ دا يێ به‌رده‌وامه و ب گۆره‌يى زانياريان فرۆكێن شه‌ركه‌رێن هه‌ڤپه‌يمانان ژى بۆردۆمانا چه‌كدارێن داعش ل هنده‌ك ده‌ڤه‌ران كريه.
ب گۆره‌يى ئه‌و پێزانينێن په‌يج و ئه‌كاونتێن ل كۆبانێ هه‌ين و هاتينه به‌لاڤكرن، نێزيكى 20 كه‌سان شه‌هيد بووينه و نێزيكى 40 كه‌سان ژى بريندارن.
