محه‌مه‌د حاجى مه‌حمود: ل كوردستانێ قه‌يرانا عه‌قلى يا هه‌يى
ئه‌ڤرۆ نيوز:
محه‌مه‌د حاجى مه‌حمود، سكرتێرێ حزبا سوشاليستا ديموكراتا كوردستانێ ئاماژه ب وێ چه‌ندێ دكه‌ت كو ئه‌گه‌رێ ڤان هه‌موو قه‌يرانێن هه‌ين و هه‌رێم تووش بوويێ، قه‌يرانا عه‌قلى يه بۆ دارشتنا پلان و ستراتيژيه‌تا ماوه‌درێژ بۆ ب رێڤه‌برنا هه‌رێما كوردستانێ.
محه‌مه‌د حاجى مه‌حمود، بۆ مالپه‌رێ سورێن يێ نێزيكى حزبا وى راگه‌هاند: “قه‌يرانا ئابوورى ره‌نگه ئێك بيت ژ وان قه‌يرانێن سه‌ره‌كى ل كوردستانێ، هه‌روه‌سا سه‌پاندنا شه‌رى د ڤان كاودانێن خوازيار دا كو رۆژانه خه‌لك و پێشمه‌رگێ كوردستانێ شه‌هيد دبن و خوين ژێ درژيت، ئه‌ڤ شه‌ره ژى پێدڤى ب مه‌زاختيێن دارايى هه‌يه”.
زێده‌تر دبێژيت: “ژ لايه‌كێ دى ڤه قه‌يرانێن خزمه‌تگۆزاريان و قه‌يرانا نه‌بوونا به‌روبوومێن ناڤخۆى يێن كوردستانێ و پاشكه‌فتنا مووچه‌يى و قه‌يرانا پانزين و كاره‌بێ و دشێم بێژم يا راگه‌هاتدنێ يه ژى، به‌لێ ره‌نگه د راستى دا قه‌يرانا عه‌قلى بيت، ژ به‌ر هندێ قه‌يرانا عه‌قلى وه‌كريه هه‌موو ئه‌و قه‌يران دروست ببن، ل گه‌ل رێزێن من بۆ هه‌موو لايه‌كى ره‌نگه قه‌يرانا عه‌قلى ئێك بيت ژ وان قه‌يرانێن كوردستان روو ب روويێ ڤان كاودانان كرى”.
سكرتێرێ حزبا سوشاليس ديموكراتا كوردستانێ به‌حس ل وێ چه‌ندێ ژى دكه‌ت كو هه‌كه ل وه‌لاته‌كى به‌رنامه هه‌بيت و بشێت به‌رنامێ دوور و نێزيك بۆ پاشه‌رۆژێ ب دارێژيت، باوه‌ر ناكه‌ت ب ڤى ره‌نگى ئه‌ڤ هه‌موو قه‌يرانه روو بده‌ن.