شەش راگرێن زانکۆیا دھۆک ژ نشکەکێ ڤە دھێنە گوھۆرین
ئەڤرۆ نیوز:
پرۆفیسور د. موسا مستەفا راگرێ فەکۆلتیا زانستێن مرۆڤایەتی بۆ ئەڤرۆ دیار کر، بریار نەیا دروستە و نەقانوونی و نە کارگێری یە و نەزانستی یە، چونکو گوھۆرینا راگران ئەڤێن چار سال ب سەر ڤەچووین لیژنەک ھاتبوو پێکئینان و چاڤپێکەفتن ھاتەکرن و ھەر کەسەکێ ڤیایی پێشکێشکر و ناڤ چووینە ئەنجوومەنێ وەزیران و ھەتا نوکە ناڤێن چو کەسان ل ھەموو زانکۆیێن ھەرێمێ نە دەرکەفتینە، راگر بەردەوامن ل سەر کارێ خوە وەک رێڤەبەرێ گشتی و ب ئیمزا سەرۆک وەزیران ھاتینە دانان و دڤێت ب ھەمان ئیمزا ژ پۆستێ خوە بھێتە لێبورینکرن.
د. موسا زێدەتر گۆت: زانکۆیا دھۆکێ نڤسیارەکا نھێنی چێکریە و نزانین چو تێدا نڤسێیە و باراپتر دھێت کو ل سەر داخازا ڤان راگران و کەسەک ژ مە چو داخوازی نەکرینە و سەرۆکێ زانکۆیێ ھنارتیە وەزارەتێ و بۆ ئەنجوومەنێ وەزیران بلند کریە، نە یا بەر ئاقلە راگرەکێ شەرعی و قانوونی پلا پروفیسور دەرکەفیت و دکتورەکی یان ھاریکارێ وی دانان بێ بۆنیاتەکێ قانوونی ھەبیت، ھەڤالان خواست بوو نڤسیارێ ببینن، لێ گۆتن نڤیسار نھێنی یە، ئەڤە نە د جھێ خوە دایە، چونکو ھندەک کەسان پۆست وەرگرتینە و چو پەیوەندی ب کاری ڤە نینە و ئەو شارەزایی نینە.
ھەمان دکتور گۆت: دڤێت مە داخوازا لێبورینێ کربا و ئەڤە مە نەکریە و مە گولێ بوویە نڤسیار بۆ وەزارەتێ ھاتیە بلندکرن گۆتینێ ل سەر داخوازا راگران، ھەکە پێشکێشی دادگەھێ بکەین سەرۆکێ زانکۆیێ دھێتە دادگەھکرن، داخواز دکەین بەلگەنامە بگەھنە مە، ل سەر چو بنیات ھاتینە لێبورینکرن؟ ھەکە مە قوسیریەک کریە یان مە شارەزایی نینە، یان مە گەندەلی کریە، دڤێت بھێت دیارکرن، ھەر کەسەک ژ مە راگرێ چوار کولیژانە، فەرمان چوویە ئەنجوومەنێ وەزیران دانانا راگرێن نوو ئەو ژی نەھاتیە، مە cv یێن خوە پێشکێش کربوونە ڤە، دبیت دەربچینە ڤە دێ بۆ ھاریکارەکی یان مامۆستایەکی دانە جھێ مە.
د.ئەحمەد محەمەد ێالح، راگرێ فەکۆلتیا زانستی گۆت: گوھۆرین د وارێ کارگێری دا د باشن و ئەڤە دێ پتر خزمەتێ پێشکێش کەت و تشتەکێ نۆرمالە و ھەکە ل ھەموو جھان بھێتە بجھئینان، لێ پێدڤیە ب شێوەکێ زانستی بن و ل سەر بۆنیاتێ شیانان بیت و گۆت: گەلەک کۆلیژان پێشکێش نەکریە، بۆ نموونە کولیژا پزیشکی فەکۆلتیا پزیشکی نێزیکی ٣٠٠ مامۆستا ھەنە، ب تنێ کەسەکی cv یێ خوە فرێکربوو، فەکۆلتیا مە دو کەسان cv یا خوە فرێکربوو، چەندینcv زێدەتر بن دێ کەسانێن خودان شیان ھێنە ھەلبژارتن.
د. لوقمان تەیب عومەر، راگرێ فەکۆلتیا ڤێتێرنەری گۆت: زانکۆیێن ھەرێمێ وەک دھۆکێ پێنگاڤ ھاڤێتینە، لێ یا زانکۆیا دھۆکێ ئەنجام دای وان نەکریە، زانکۆیا دھۆکێ ب وەکالەت دەرێخستیە ل زانکۆیێن دی ئەڤە نەھاتیەکرن، ئەڤە ژ نیشکەکێ ڤە ھاتیە دەرخستن کو بھێنە لێبورینکرن ھەتا پوست بھێنە پرکرن، دیسا دەم نە یێ گونجایە وەختێ ڤێ چەندێ نەبوو و تاقیکرن و پۆست ببنە وەکیلانێ، لێ سیستەم ب سرۆشتی دھێتە برێڤەبرن، دبیت د بیاڤێ کارگێری و دارایی دا کێشەکێ دروست بکەن، زانکۆیێ شیا خوە بگریت و نوکە دەم نەبوو ھەتا پۆست ھاتبانە و ئەڤێن کەڤن ب خێربچن.
د. موەفق سلێمان بەرواری، راگرێ فەکۆلتیا چاندنێ گۆت: تشتەکێ شارستانیە گوھۆرین و رەنگ مە پتریا راگران لێبورین داخازکربوو کو ماوێ مە پتر ژ چار سالان بووریە، ماف ھەر کەسەکی یە خوە کاندید بکەت، لێبورینا مە گەلەک ب سەر ڤەچوو، ئەکادیمی کارێ وی نە ب تنێ پۆستن، بەلکو ڤەکۆلینە و ھەر سیستەمەکێ گرێدایی خواندنا بلند.
د. موەفق بەرواری گۆت ژی: زانکۆیێ تشتەکێ باش کریە و ئەڤە بجھئینانا قانوونێ یە و دوھی مە دووماھی کۆمبوونا جڤاتێ کر و دێ پۆستێ خوە رادەستی کەسەکی کەین، داخاز دکەین ل ھەموو ھەرێمێ سیستەمێ چار سالی بھێتە بجھئینان و نە ب تنێ خواندنا بلند، بەلکو ھەموو رێڤەبەریان.
د. عارف یونس سالح بالەتەیی، راگرێ فەکۆلتیا زانستێن پزیشکی گۆت: سیستەمێ چار سالی بەرنامێ وەزیرێ بەرێ بوو د.دلاوەر و چار سالێن مە ب دووماھی ھاتن و ب سەر ڤەچوو، ئەز ئێک ژ وان بووم کو ڤی پۆستی ناکەمە ڤە و مە پێشکێش ژی نەکریە و مە داخواز گوھۆرینێ کربوو و ئەڤە پرۆسێسەکا ساخلەم و خوزی ل کوردستانێ ھەموو رێڤەبەرێن گشتی وەک پەرلەمانتار و وەزیران ھاتبانە گوھۆرین.
د. عارفی ھێشتا گۆت: ئەڤێن ھاتینە دانان ب وەکالەتن و نە شوونگرن و ھاریکارا من ل جھێ من کار دکەت، دادپەروەری ھاتیەکرن و نۆرمالە و ئەڤە د فەرمانێ ژی دا ھاتیە و مە ڤیایە، دڤێت مرۆڤ نەچیتە کورسیکا و ئەڤە یا گرنگە.
پرۆفیسور د. ئودێد عودیشۆ راگرا فەکۆلتیا زانستێن پەروەردەیی گۆت: گوھۆرین تشتەکێ باشە و نۆرمالە و ساخلەمە و دەسپێکا سالا خواندنێ یە و دەمێ گونجایە و فەرمانا حوکمەتێ یە، دڤیا کەسێن بھێنە دانان خودان ئەزموون بن و تایبەتمەندی ھەبیت، دا کار نە راوستیت، ئودێد ئاشکراکر کو پێشکێشکریە بۆ پۆستێ ھاریکارێ سەرۆکێ زانکۆیا دھۆکێ بۆ کارۆبارێن کارگێری.
رۆژناما ئەڤرۆ پەیوەندی ب د. لوقمان محەمەد سالح کر کو ھاریکارێ سەرۆکێ زانکۆیا دھۆکێ یە، لێ پەیوەندیا یا بەردەست نەبوو و گرتی بوو.
د.موسلح دھۆکی، سەرۆکێ زانکۆیا دھۆکێ، ل دور بابەتی گۆت: ماوێ قانوونی چار سالن و ب دووماھی ھات و ل دووڤ فەرمانا ئەنجوومەنێ وەزیران ھات ب ناڤێن وان کو دووماھی ب خزمەتا وان بھێتە کرن و وەکیل ل جھێن وان بھێنە دانان، ھەتا ئەنجامێن چاڤپێکەفتنێ دەردکەڤن و نڤیسار ژ ئەنجوومەنێ وەزیران دەرکەفتیە ب ئیمزا سەرۆکێ حوکمەتێ یە کو وەکیل ل جھێن وان بھێنە دانان و ھەکە دەستھەلاتا وەزیری بوو دێ ھاریکارێن راگران دانین ب وەکالەت کو پلا دکتورا ھەبیت و رەنگە ھندەک ل جھێن خوە بمینن، چونکو ھندەک ژ وان پێشکێشکریە ڤە و ماف ھەیە چار سالێن دی ژی بمینن.
د. موسلح دھۆکی دیار کر، حەفت پوست دێ ھێنە پرکرن و ھندەکێن نوو ژی ھاتینە وەک ھاریکارێ سەرۆکێ زانکۆیێ بۆ کارۆبارێن قوتابیان و گۆت: پوستێ من ژی ھەکە چار سال ب دووماھی ھاتن دێ ھێتە راگەھاندن، وەزیری دەستھەلات ھەیە بلند کەت کو بمینیت و ھەتا سەرۆک زانکۆ ژی دھێنە راگەھاندن، ھەر دو زانکۆیێن سلێمانی و سەلاحەدین ژی بریار بجھئیناینە و فەرمانا وەکالەتێ ژی گەھشتیە ھندەک کولیژان، نە دەستھەلاتا سەرۆکێ زانکۆیێ و نە یا وەزیری یە راگران لێبورین بکەت و نە ئێکی بدانیت و ئەڤە وەزارەتێ ژ مە داخواز کربوو و کێ چار سال ب دووماھی ئیناینە و وەزارەتێ بۆ ئەنجوومەنێ وەزیران بلندکریە و بەرسف دا ب ناڤ کو بھێنە لێبورین و وەکیل ل جھێ وان بھێنە دانان.
د. سەعەدوللا ھاریکارێ سەرۆکێ زانکۆیا سەلاحەدین بۆ ئەڤرۆ خویا کر، ل زانکۆیا مە ژی پۆست ھەنە و کەسێن چار سالێن خوە تەمام کرین ناڤێن وان ھاتینە بلندکرن و ھندەکا چاڤپێکەفتن کریە و ھەتا نوکە ئەنجام نە دەرکەفتینە، دیسان راگر و ئەو کەسێن چار سال تەمام کرین د کاری دانە و چو کەس ب وەکالەت مە نەداناینە جھێ وان و ڤێ چەندێ رازیبونا ئەنجوومەنێ وەزیران دڤێت.
پرۆفیسور سەلاحەدین سەعید سەرۆکێ زانکۆیا سلێمانیێ بۆ رۆژناما ئەڤرۆ گۆت: ھێشتا فەرمانا ئەنجوومەنێ وەزیران دەرنەچوویە بۆ دانانا کەسان ب وەکالەت، لێ دوھی نڤسیار مە بۆ وەزارەتێ بلندکریە کو ئەڤە دەستی ژ پۆستێن خوە بەردەن و ب وەکالەت بھێنە برێڤەبرن، ئاشکراکر ژی کو زانکۆیا سلێمانیێ ١٠ پۆست دێ ب وەکالەتان ھێنە پرکرن کو دو ھاریکارێن سەرۆکێ زانکۆیێ نە، ل گەل ھەشت راگران.