به‌رپرسه‌كێ پله بلندێ گۆڕان ده‌ست ژ كار به‌ردا
ئەڤرۆ نيوز:
بەرپرسێ کۆمەلایەتیێ مەکویا تەڤگەرا گۆڕان ل پارێزگەھا دھۆک دەست ژ کارێ خوە کێشایە و بۆ رۆژناما ئەڤرۆ دیار کر کو ئەگەرێ سەرەکی یێ دەست ژ کارکێشانا وی ئەوە کو ھەتا نھا چ سۆزێن دگەل گوتین بجە نەئیناینە و گۆت “ب دروستی قەناعەت بۆ من پەیدا بوو کو گۆڕان نەشێت چ گھۆرینا بکەت، بەس سۆزێن بێ کریار ددەت”.
عەبدولعەزیز ئیسماعیل حەجی بەرپرسێ کۆمەلایەتیێ مەکویا تەڤگەرا گۆڕان ل پارێزگەھا دھۆک دیار کر کو ل دەستپێکا چوویە د ناڤ رێزێن گۆڕان دا گۆتێ دێ پۆستێ بەرپرسێ کۆمەلایەتیێ گۆران ل دەڤەرا بادینان دەنێ و گۆت “بەس ب ناڤ ئەز کربوومێ بێ کریار و ھەتا ڤێ دووماھیێ گەف ل من ھاتینە کرن”.
عەبدولعەزیز ئیسماعیل ئاشکرا ژی کر کو گۆڕان داخواز ژ وی کریە وەکو نوونەرێ گۆڕان ل دەڤەرا بادینان ل سەر شاشێن کەنالێن راگەھاندنێ بئاخڤیت و بەحسێ سەرڤەچوونا سەرۆک بارزانی بکەت و بێژیت پێدڤیە ل پەرلەمانی بھێتە ھەلبژارتن و گۆت “من قەبیل نەکر ب خرابی بەحسێ رۆلێ سەرۆک بارزانی بکەم، چونکو قارەمانیا سەرۆک بارزانی یا دیار و بەرچاڤە و ھەموو جیھان دزانیت و ژبەر ڤێ چەندێ من دەست ژ کارکێشانا خوە راگەھاند”.
بەرپرسێ کۆمەلایەتیێ مەکویا تەڤگەرا گۆڕان ل دھۆکێ دیار ژی کر کو ئەڤە ل دەستپێکا ھەلبژارتنێن بۆری دگەل رێزێن گۆران بوو و ھەتا نھا چ مووچە بۆ نەھاتینە دابینکرن و گۆت “گۆڕان ل دەڤەرا بادینان گەلەک سۆز دانە مە، لێ خەلکێ خوە پشتراست دکەم کو ئەو تشتێ گۆڕان دبێژیت بەس گۆتنە و کریارێ ب گۆتنێن خوە ناکەن”.
