مامۆستایێن باژێران خانیا و یێن قەزا و ناحیان ئەردی دێ وەرگرن
ئه‌ڤرۆ نيوز:
سەرۆکێ ئێکەتیا مامۆستایێن کوردستانێ ئاشکرا کر کو پڕۆژەک بۆ ئاڤاکرنا یەکەیێن ئاکنجیبوونێ بۆ مامۆستایێن سەنتەرێ باژێران ھاتیە بەرھەڤکرن و بۆ مامۆستایێن قەزا و ناحیان ژی وان داخوازا بەلاڤکرنا پارچێن ئەردی کریە و پشتی ب دووماھی ھاتنا پڕۆژەی دێ ھێتە بلندکرن بۆ سەرۆکاتیا جڤاتا وەزیران.
عەبدولواحد محەمەد، سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ دیار کر کو د کۆمبوونا مەکتەبا سکرتاریەتا ئێکەتیا مامۆستایێن کوردستانێ دا د گەل جێگرێ سەرۆک وەزیرێن ھەرێما کوردستانێ وان داخوازکریە رەوشا نوکە یا ھەرێما کوردستانێ و ژیانا تەخا مامۆستایان بەرچاڤ بھێتە وەرگرتن و ئەو مامۆستایێن ژ دەرڤەی باژێڕان ھاتینە دامەزراندن حەفتیێ دو رۆژان بھێنڤەدان ھەبیت و ھەر دەمێ وانێن وان ب دووماھی ھاتن بشێن بچنە مالێن خوە و گۆت: “ھەر دڤێ کۆمبوونێ دا مە داخوازکر بۆ مامۆستایێن سەنتەرێن باژێڕان خانی و شقە ب قستێن دومدرێژ بھێنە ئاڤاکرن و نەھێلن گیرۆبوونا مووچەی کاربکەتە سەر ژیانا مامۆستایان”.
ناڤھاتی ئاماژە دا وێ چەندێ کو بۆ ڤێ مەرەمێ نوکە وان پڕۆژەک بەرھەڤکریە و دێ ھێتە بلندکرن بۆ سەرۆکاتیا جڤاتا وەزیرێن ھەرێما کوردستانێ دا کو پارچێن ئەردی ل سەر مامۆستایێن ناحیا و قەزایان بھێنە بەلاڤکرن، چونکو ئەرد ل قەزا و ناحیان یێ ھەی و پێدڤیە مامۆستا ژێ مفادارببن و گۆت: “ھەر دەمێ پڕۆژە ب دووماھی ھات دێ بۆ لایەنێ پەیوەندیدار ھێتە ھنارتن و کار بۆ ب جھئینانێ دێ ھێتەکرن”.